Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 256 Hüküm no: 333 Orijinal metin no: [92b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Bey b. Abdullah’ın mülk menzilini Ahmed Ağa b. Rıdvan’a yüz elli kuruşa sattığı Husûs-ı âti’l-beyânı mahallinde tahrîri için bi’t-taleb irsâl olunan Mevlana Hızır Efendi ol dahi zeyl-i kitâbda mastûru’l-esâmî olan Müslimîn ile mahrûse-i Galata muzâfâtından kasaba-i Beşiktaş’da Sinanpaşa mahallesinde sâkin Ahmed Bey b. Abdullah nâm cündî[nin] mahkî? menziline varup akd-i meclis-i şer‘ eyledikde meclis-i mezbûrda merkūm Ahmed Bey işbu râfi‘ü’l-kitâb mefharü’z-zu‘amâ Ahmed Ağa b. Rıdvan mahzarında ikrâr ve takrîr-i kelâm edüp silk-i mülkümde muntazam akd-i âtî sudûruna değin taht-ı tasarrufumda olup mahalle-i mezbûrede vâki‘ iki tarafdan kendi mülküm ve bir tarafdan merhûm Küçücük Mehmed Ağa Vakfı ve bir tarafdan tarîk-i âm ile mahdûd ve mümtâz mülkümden ifrâz edüp dört bâb fevkānî odayı ve dehlîzi ve tahtında ahırı ve bi’r-i mâyi ve kenîfi ve havluyu ve önünde tûlen kırk yedi zirâ‘ ve arzen yirmi beş zirâ‘ eşcâr-ı müsmire ve gayr-ı müsmire bahçeyi müştemil mülk menzilimi ba‘de vaz‘ı’l-alâme mersûm Ahmed Ağa’ya tarafeynden îcâb ve kabûlü hâvî bey‘-i bâtt-ı sahîh-i şer‘î ile sekiz yüz elli kıt‘a riyâlî guruşa bey‘ ve teslîm edüp ol dahi iştirâ ve tesellüm eyledikden sonra semeni olan meblağ-ı merkūm sekiz yüz elli kıt‘a riyâlî guruşu mezbûr Ahmed Ağa’nın yedinden tamâmen ahz u kabz eyledim ba‘de’l-yevm zikr olunan menzil-i [93a] mahdûd ve bahçe-i müfreze merkūm Ahmed Ağa’nın mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîki’ş-şer‘î vicâhen ve şifâhen mâ-hüve’l-vâkı‘ mevlânâ-yı mezbûr mahallinde tahrîr ba‘dehû gelip meclis-i şer‘de alâ-vukū‘ihî inhâ ve takrîr etmeğin bi’t-taleb ketb olundu. Fi’l-yevmi’r-râbi‘ aşer min-Muharremi’l-harâm li-sene selâse ve sittîn ve elf. Şühûdü’l-hâl: el-Hâc Mustafa b. Yakub, Mustafa Çelebi b. Mehmed el-müezzin, el-Hâc Hasan b. ( ), Murad Çelebi b. Mehmed, Halil Çelebi b. Hüseyin, Sefer Bey b. Abdullah, Şâtır Ahmed Çelebi b. Mehmed, Mustafa Beşe b. Mehmed, Mehmed b. Ramazan, Mustafa b. Menteşe ve gayruhüm.