Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 260 Hüküm no: 337 Orijinal metin no: [93b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Mitro v. Nikola’nın Sinanpaşa mahallesindeki bağının varisleri tarafından Andreçko v. Mihal’e satıldığı Mahrûse-i Galata’ya tâbi‘ kasaba-i Beşiktaş’da Sinanpaşa mahallesinde sâkin iken bundan akdem mürd olan Mitro v. Nikola nâm zimmînin verâseti zevce-i metrûkesi Paşe bt. Nikola nâm Nasrâniyeye ve sulbî kebîr oğlu Hürmüz’e ve sulbiye kebîre kızları İline ve Angeline ve Zanbolye nâm Nasrâniyelere şer‘an zâhir ve mütehakkık oldukdan sonra mezbûre Paşe ve mezbûr Hürmüz ve mezbûrât İline ve Angeline ve Zanbolye mahfil-i kazâda işbu râfi‘ü’s-sifr Andreçko v. Mihal nâm zimmî muvâcehesinde her biri ikrâr-ı tâm ve takrîr-i kelâm edüp mürd-i merkūmun terekesinden olup kasaba-i mezbûre bağları kurbünde Küçük Ayazma nâm mevzi‘de vâki‘ bir tarafdan Anton v. Tarator nâm Ermeni bağı ve bir tarafdan Angeli v. ( ) nâm zimmî bağı ve bazen Yagob ve bazen Mitri bağı ve bir tarafdan Hıristorkoli v. Yamandi nâm zimmî bağı ile mahdûd tahmînen dokuz dönüm mikdârı bağımızı mezbûr Andreçko’ya tarafeynden îcâb ve kabûlü hâvî otuz bir kıt‘a riyâlî guruş-ı kebîr ile bir rub‘a bâtten bey‘-i kat‘î ile bey‘ ve teslîm ol dahi iştirâ ve tesellüm eyledikden sonra semeni olan meblağ-ı merkūm otuz bir kıt‘a guruş ile bir rub‘u mezbûrun yedinden her birimiz [94a] ahz u kabz eyledikden sonra bundan esbak merhûm Mustafa Ağa Vakfı’nın mütevellîsi Hüseyin Usta b. Abdullah’a otuz bir guruş ile bir rub‘ deynine edâ ve teslîm ve def‘ olunmuşdur ba‘de’l-yevm zikr olunan bağ müşterî-i mezbûr Andreçko’nun mülk-i müşterâsıdır keyfe mâ yeşâ ve yehtâr mutasarrıf olsun dediklerinde gıbbe’t-tasdîki’l-vicâhî mâ-vaka‘a bi’t-taleb ketb olundu. Fi’l-yevmi’s-sâdis ve’l-ışrîn min-Muharremi’l-harâm li-sene selâse ve sittîn ve elf. Şühûdü’l-hâl: Hızır Efendi el-müderris, İbrahim Çelebi b. Mahmud, Hüseyin Usta [b.] Abdullah, Yusuf Bey b. Abdullah, Hüseyin Çelebi b. Mehmed, Mehmed Beşe b. Ali el-râcil. Huddâm; Yani v. Nikola, Yani v. Marko, Kanber v. Menha, İstirati v. Dimo.