Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 261 Hüküm no: 340 Orijinal metin no: [94b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lenberyo v. Andreya’nın Arnavutköy’deki boş arsasını Sivastos v. Seyahtosto’ya yirmi kuruşa sattığı Mahrûse-i Galata muzâfâtından kasaba-i Beşiktaş’a tâbi‘ Arnavud nâm karye sükkânından Lenberyo v. Andreya nâm zimmî meclis-i şer‘-i hatîr-i lâzımü’t-tevkīrde işbu râfi‘ü’s-sifr Sivastos v. Seyahtosto nâm zimmî muvâcehesinde ikrâr-ı tâm ve takrîr-i kelâm edüp akd-i âtî sudûruna değin taht-ı tasarrufumda olup karye-i merkūmede vâki‘ iki tarafından kendi mülküm ve bir tarafından Bakka[l] Yorgi nâm zimmî mülkü ve bir tarafından tarîk-i âm ile mahdûd ve mümtâz ve silk-i mülkümden ifrâz edüp tûlen on altı zirâ‘ ve arzen dokuz buçuk zirâ‘ arsa-i hâliyemi mezbûr Sivastos’a tarafeynden îcâb ve kabûlü hâvî bey‘-i kat‘î ile yirmi kıt‘a riyâlî guruş-ı kebîre bey‘ ve teslîm edüp ol dahi iştirâ ve tesellüm eyledikden sonra semeni olan meblağ-ı merkūm yirmi kıt‘a riyâlî guruşu mezbûr Sivastos yedinden tamâmen ahz u kabz eyledim ba‘de’l-yevm zikr olunan arsa-i hâliye mezbûr Sivastos’un silk-i mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîki’ş-şer‘î vicâhen mâ-vaka‘a bi’t-taleb ketb olundu. Fi’l-yevmi’r-râbi‘ min-Saferi’l-hayr li-sene selâse ve sittîn ve elf. Şühûdü’l-hâl: Ali b. Mahmud, el-Hâc Hasan b. ( ), Mehmed Beşe b. Abdullah, Mustafa Beşe b. Mehmed, Mehmed b. Ramazan, Cafer b. Mehmed, Mehmed Çelebi b. Mahmud ve gayruhüm mine’l-hâzırîn.