Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 262 Hüküm no: 341 Orijinal metin no: [94b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ezmariğde bt. Yorgi’nin bağını kocası Manol v. Kondi’ye iki yüz kuruşa sattığı Mahrûse-i Galata’ya tâbi‘ kasaba-i Beşiktaş’da Sinanpaşa mahallesinde sâkine Ezmariğde bt. Yorgi nâm Nasrâniye mahfil-i kazâda zevci işbu râfi‘ü’s-sifr Manol v. Kondi muvâcehesinde ikrâr ve takrîr-i kelâm edüp Mallı Ayazma’da bir tarafı Petro nâm zimmî bağı ve bir tarafı Andreya nâm zimmî bağı ve iki tarafı vâdi ile mahdûd tahmînen on beş dönüm mikdârı bağımı zevcim mezbûr Manol’a bey‘-i kat‘î ile iki yüz kıt‘a riyâlî guruşa bey‘ ve teslîm ol dahi iştirâ ve tesellüm eyledikden sonra semeni olan meblağ-ı merkūm iki yüz guruşu yedinden ahz u kabz eyledim ba‘de’l-yevm zikr olunan bağ merkūm Manol’un mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîki’ş-şer‘î vicâhen mâ-vaka‘a bi’t-taleb ketb olundu. Fi’l-yevmi’s-sâmin min-Saferi’l-hayr li-sene selâse ve sittîn ve elf. Şühûdü’l-hâl: İbrahim Bey b. Abdullah, Hüseyin Çelebi b. Hüseyin, Osman Beşe b. Ali, Hüdâverdi b. Abdullah, Hızır Efendi el-müderris, Mustafa Beşe b. Mehmed ve gayruhüm. Huddâm: Andreçko [v.] Mihal, Matyos [v.] Mardiros, Yamandi [v.] Nikola, Yanaki [v.] Dimitri, Hıristorkoli [v.] Yamandi, Yanaki [v.] Arslan.