Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 262 Hüküm no: 342 Orijinal metin no: [94b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muslı b. Şaban’ın Onikidivan kazasındaki bazı tarlalarının kullanım hakkını Abdülkādir Efendi b. Hacı İsmail’e devrettiği Mahrûse-i Galata’ya tâbi‘ kasaba-i Beşiktaş’da Sinan Paşa-yı Cedîd mahallesinde sâkin Muslı b. Şaban mahfil-i kazâda işbu râfi‘ü’l-kitâb Abdülkādir Efendi b. el-Hâc İsmail mahzarında ikrâr ve takrîr-i kelâm edüp Vilâyet-i Anadolu’da Onikidivan kazâsına tâbi‘ Çarbend karye kurbünde Kulupınarı nâm mevzi‘de vâki‘ bir tarafdan müşterî-i mezbûr tarlası ve bir tarafdan Mahmud nâm kimesne tarlası ve iki tarafdan arz-ı hâliye ile mahdûd eşcâr-ı müsmiresiyle bir kıt‘a tarlamı ve yine karye-i merkūme kurbünde Kuranharmanı nâm mevzi‘de vâki‘ iki tarafdan Yeke Hüseyin nâm kimesne tarlası ve iki tarafdan Ali Usta nâm kimesne tarlası ile mahdûd on beş keyl tohum istî‘âb eder tarlalarımı mezbûr Abdülkādir Efendi’ye sâhib-i arz ma‘rifeti ile hakk-ı tasarrufunu ferâğ ve tefvîz edüp ol dahi tefevvüz ve kabûl eyledikden sonra mukābele-i tefvîz bin elli beş nakd-i râyicü’l-vakt fıddî akçe ahz u kabz edüp zikri mürûr eden iki kıt‘a mezâri‘i mahallinde zabt ve tasarrufa merkūm Abdülkādir Efendi’ye taslît eyledim dedikde gıbbe’t-tasdîki’l-vicâhî mâ-vaka‘a bi’t-taleb ketb olundu. Fi’l-yevmi’s-sâlis aşer min-Saferi’l-hayr li-sene selâse ve sittîn ve elf. Şühûdü’l-hâl: Mehmed Efendi el-müderris, Bahaî Efendi el-müderris, Ali Beşe b. Himmet, Musa b. Cihan, Sefer Beşe b. el-Hâc Hayreddin, Hasan Efendi b. Hüseyin, Resul b. Mahmud, Yusuf b. Hamza, huddâm.