Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 263 Hüküm no: 343 Orijinal metin no: [95a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şakire bt. Abdullah’ın yarım menzil hissesini damadı Mustafa Bey b. Abdullah’a seksen bin akçeye sattığı Mahrûse-i Galata’ya tâbi‘ kasaba-i Beşiktaş’da Sultân Süleyman aleyhi’r-rahmetü ve’l-gufrân mahallesi sâkinlerinden iken bundan esbak müteveffâ olan Mehmed Bey b. Mustafa’nın verâseti zevce-i metrûkesi Şâkire bt. Abdullah nâm hatun ve sulbiye kebîre kızı Emine’ye münhasıra olduğu şer‘an zâhir ve mütehakkık oldukdan sonra mezbûre Şâkire Hatun mahfil-i kazâda işbu râfi‘ü’l-kitâb damadı Mustafa Bey b. Abdullah nâm cündi mahzarında ikrâr-ı tâm ve takrîr-i kelâm edüp zevcim müteveffâ Mehmed Bey’den bi-hasebi’l-irsi’ş-şer‘î altı bin akçe mehr-i müsbetin ve sümün hisse-i şer‘iyye-i şâyi‘âm mukābelesinde nısf bana ve nısf-ı âharı mezbûre Emine’ye intikāl edüp mahalle-i merkūmede vâki‘ bir tarafdan İsmihân Hatun bt. Şaban mülkü ve bir tarafdan Mustafa Reis mülkü ve iki tarafdan tarîk-i âm ile mahdûd ve bir bâb fevkānî oda ve sofa ve tahtında ahırı ve kenîfi ve zât-ı eşcâr-ı müsmire ve gayr-ı müsmire bahçeyi müştemil menzilde nısf hisse-i şer‘iyye-i şâyi‘amı damadım mezbûr Mustafa Bey’e tarafeynden îcâb ve kabûlü hâvî bey‘-i kat‘î ile seksen bin nakd-i râyicü’l-vakt fıddî akçeye bey‘ ve teslîm edüp ol dahi vech-i muharrer [üzere] iştirâ ve tesellüm eyledikden sonra semeni olan meblağ-ı merkūm seksen bin akçeyi merkūm Mustafa Bey yedinden ahz u kabz eyledim ba‘de’l-yevm zikr olunan menzilde nısf hisse-i şer‘iyye-i şâyi‘ mersûm Mustafa Bey mülk-i müşterâsı ve nısf ahırı merkūme Emine’nin mülk-i mevrûsudur benim kat‘â alâka ve medhalim yokdur dedikde gıbbe’t-tasdîki’ş-şer‘î vicâhen ve şifâhen mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Saferi’l-hayr li-sene selâse ve sittîn ve elf. Şühûdü’l-hâl: Fahrü’l-kuzât Abdurrahman Efendi b. Mahmud, Fahrü’l-müderrisîn Hızır Efendi b. Nasûh, Yahya Çelebi b. Nasûh, Sefer Beşe b. Yusuf, Veli Reis b. Şaban, İbrahim b. Mehmed, Mehmed Beşe b. Abdülkerîm, İsmail Beşe b. Uğur, Mehmed b. Ramazan, Mustafa Beşe b. Mehmed, Cafer el-muhzır ve gayruhüm mine’l-hâzırîn.