Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 264 Hüküm no: 344 Orijinal metin no: [95a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Musa b. Seydi’nin Maçka mahallesindeki menzilini oğlu Ali’ye beş bin akçeye sattığı Mahrûse-i Galata’ya tâbi‘ kasaba-i Beşiktaş’da Maçuka mahallesi sâkinlerinden Musa b. Seydi nâm kimesne mahfil-i kazâda oğlu işbu râfi‘ü’l-kitâb Ali mahzarında ikrâr edüp mahalle-i mezbûrede vâki‘ bir tarafdan oğlum Hüseyin mülkü ve bir tarafdan Arnavud Hüseyin mülkü ve bir tarafdan Hüseyin Bey mülkü ve bir tarafdan tarîk-i hâs ile mahdûd iki bâb tahtânî odayı ve bi’r-i mâ’î ve kenîfi ve zât-ı eşcâr-ı müsmire ve gayr-ı müsmire, muhavvatayı müştemil olan menzilimi ba‘de’t-tahliyeti’l-tekābüz oğlum mezbûr Ali[‘ye] bey‘-i kat‘î ile beş bin nakd-i râyicü’l-vakt fıddî akçeye bey‘ ve teslîm edüp ol dahi iştirâ ve tesellüm eyledikden sonra semeni olan meblağ-ı merkūm beş bin akçeyi oğlum mezbûr Ali’nin yedinden ahz u kabz eyledim ba‘de’l-yevm zikr olunan menzil oğlum Ali’nin mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîki’ş-şer‘î vicâhen mâ-vaka‘a bi’t-taleb ketb olundu. Fi’l-yevmi’s-sâmin aşer min-Saferi’l-hayr li-sene selâse ve sittîn ve elf. Şühûdü’l-hâl: Arslan Bey b. Sefer, el-Hâc Mustafa b. Yusuf, el-Hâc Mehmed b. Ali, Yusuf b. Mustafa, Hüseyin b. Musa, Seydi b. Ali, Hızır Efendi el-müderris, huddâm ve gayruhüm.