Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 264 Hüküm no: 346 Orijinal metin no: [95b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haramiler tarafından Sinanpaşa mahallesinde oturan Ermeni Serkis’in evi basılıp eşya ve parasının gaspedildiği Mahrûse-i Galata’ya tâbi‘ kasaba-i Beşiktaş’da bi’l-fi‘il subaşı olan İbrahim Bey b. ( ) ve kasaba-i mezbûre yasakçıları İbrahim Beşe ve Arslan Beşe târih-i kitâb gecesi nısfe’l-leylde mahfil-i kazâda herbiri takrîr-i kelâm ve bast ani’l-merâm edüp kasaba-i merkūmede Sinanpaşa mahallesinde sâkin Serkis v. ( ) nâm Ermeni’nin evine yirmi beş ve otuz mikdârı nefer harâmîler gelip menzil-i merkūmun içine girip gāret ve hasâret etdiklerinden mâ‘adâ menzil-i mezbûr sâhibi merkūm Serkis nice kere rencîde her yerlerine mecrûh edüp ve mahalle-i merkūme sâkinlerinden Manol v. İstefani nâm zimmîyi kurşun ile urup helâk edüp ve Kristostor v. Panyok ve Bogasib v. Mokir nâm Ermenileri dahi başlarından mecrûh edüp onlar dahi helâk olmak ihtimâli vardır cânib-i şer‘den üzerine varılup ba‘de’l-müşâhede keşf ve tahrîr olunması matlûbumuzdur dediklerinde bu fakīr zeyl-i kitâbda mastûru’l-esâmî Müslimîn ile menzil-i merkūma varup akd-i meclis-i şer‘ olundukda fi’l-vâki‘ menzil-i mezbûr sâhibi merkūm Serkis’i mecrûh eylediklerinden mâ‘adâ bir kîse içinde yüz guruş mikdârı akçesini ve esâs-ı beyt ve sâir gümüş evânî mevcûd her ne bulundu ise ahz edüp gāret ve hasâret etdikleri ve mezbûr Manol kurşun ile sol memesi üzerine urup helâk etdikleri ve merkūmân Kristostor ve Boğasib nâm Ermenileri dahi herbirlerini başından bıçak ve kılıç ta‘bîr olunur âletler ile urup mecrûh eyledikleri müşâhede olundukda vâki‘ hâl hıfzan li’l-mekāl bi’t-taleb ketb olundu. Fi’l-yevmi’t-tâsi‘ min-Saferi’l-hayr li-sene selâse ve sittîn ve elf. Şühûdü’l-hâl: Hüseyin Üstâd b. Abdullah, Yusuf b. Abdullah, Ramazan Beşe b. Abdullah, Abdi b. Ali, Mehmed b. Mustafa, Aydın Beşe b. Abdullah, Sun‘ullah Çelebi b. Hüsam Efendi, Mehmed Çelebi b. el-mezbûr ve gayruhüm.