Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 265 Hüküm no: 347 Orijinal metin no: [95b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Üstad b. Yusuf’un mülk menzilini oğlu Mehmed Çelebi’ye hibe ettiği Mahrûse-i Galata’ya tâbi‘ kasaba-i Beşiktaş’da Arab İskelesi mahallesinde sâkin fahrü’l-eşbâh Mustafa Üstâd b. Yusuf tarafından hibe-i âti’l-beyânı ikrâra vekîl olup Mehmed Ağa b. Kurd ve Mustafa Çelebi b. İbrahim şehâdetleri ile şer‘an vekâleti sâbite olan Hüseyin Beşe b. Hasan nâm bostanî mahfil-i kazâda müvekkil-i mûmâ-ileyhin sulbî sagīr oğlu işbu hâfizü’l-kitâb Mehmed Çelebi mahzarında bi’l-vekâle ikrâr-ı tâm ve takrîr-i kelâm edüp mahrûse-i mezbûre hâricinde Kitehora nâm mevzi‘de Hüseyin Ağa mahallesinde vâki‘ bir tarafdan müvekkil-i mûmâ-ileyhin sagīre kızı Âişe’nin mülk-i mevhûbu ve bir tarafdan bazen Mahmud Efendi ve bazen Frankol nâm Efrencî mülkü ve iki tarafdan tarîk-i âm ile mahdûd on yedi bâb tahtânî odaları ve kenîfi ve bi’r-i mâ’î ve zât-ı eşcâr-ı müsmire ve gayr-ı müsmire bir buçuk mikdârı bahçeyi müştemil mülk menzilini ifrâz edüp ba‘de vaz‘ı’l-alâme sagīr-i mersûm Mehmed Çelebi’ye hibe-i sahîha-i şer‘iyye ile hibe ve temlîk ve teslîm edüp yine meclis-i hibede velâyeti hasebi ile sagīr-i mersûm Mehmed Çelebi için ittihâb ve temellük ve tesellüm eyledi ba‘de’l-yevm zikr olunan menzil-i mahdûd ve bahçe-i mersûme merkūm Mehmed Çelebi’nin mülk-i mevhûbudur keyfe mâ yeşâ ve yehtâr mutasarrıf olsun dedikde gıbbe’t-tasdîki’ş-şer‘î vicâhen mâ-vaka‘a bi’t-taleb ketb olundu. Fi’l-yevmi’l-ışrîn min-Saferi’l-hayr li-sene selâse ve sittîn ve elf. Şühûdü’l-hâl: Ali Efendi b. Ahmed, diğer Ali Efendi b. Ömer, Kurd Çelebi b. Hayreddin, Yusuf Efendi b. Abdülkerîm, Hüseyin Üstâd b. Abdullah, Ömer Üstâd b. Abdullah, Süleyman Üstâd b. Abdullah, Hızır Efendi el-müderris, Mustafa Beşe b. Mehmed, huddâm.