Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 271 Hüküm no: 358 Orijinal metin no: [97b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Galata ve ona bağlı yerlerdeki değirmenlerin yıl boyu çalışanlarından doksan beş, altı ay çalışanlarından kırk yedi akçe vergi ve mübaşir ücreti alınması Akdâ kudâti’l-Müslimîn evlâ vülâti’l-muvahhidîn ma‘denü’l-fazli ve’l-yakīn hüccetü’l-hakki ale’l-halki ecma‘în vârisü ulûmi’l-enbiyâi ve’l-mürselîn el-muhtas bi-mezîdi inâyeti’l-mu‘în Mevlânâ Galata Kadısı ( ) -zîdet fezâiluhû- tevkī‘-i refî‘-i hümâyûn vâsıl olıcak ma‘lûm ola ki sefer-i hümâyûnum ve donanma gemilerinin mühimmâtı için gelen hazîne lâzım ve mühim olmağın memâlik-i mahrûsemde vâki‘ umûmen yel ve su ve at ve yağ ve susam ve horâsânı ve bi’l-cümle değirmen ıtlâk olunur dink ve aba ve kebe ve harar ve samako değirmenlerinin rüsûmları ifrâz olunup min-ba‘d sipâhîleri ve evkāf-ı selâtîn ve havâss-ı hümâyûna zâbitleri ve voyvodaları müdâhale eylemeyip iktizâ hasebiyle cümlesinin resimleri taraf-ı mîrîden ahz u kabz olunmak üzere bi’l-ittifâk vech-i meşrûh üzere hatt-ı hümâyûn-ı sa‘âdet-makrûnum ile fermân-ı âlîşânım sâdır olmağın bin altmış üç senesine mahsûb olmak üzere nefs-i Galata ve tevâbi‘inde ve nevâhîsinde vâki‘ yıl yürür değirmenlerin her bir gözünden senede seksener akçe mîrî ve on beşer akçe mübâşire vech-i maâş ve altı ay yürür değirmenlerinden kezâlik kırkar akçe mîrî ve yedişer akçe vech-i maâş olmak üzere ber-vech-i ta‘cîl cem‘ ve tahsîl ve hazîne-i âmireme irsâl ve teslîm etdirilmek fermânım olmuşdur buyurdum ki hükm-i şerîfimle vardıkda bu bâbda sâdır olan emrim üzere amel edüp dahi sen ki Galata kādısısın kat‘â bir an ve bir saat te’hîr ve tevakkuf eylemeyip târih-i mezbûra mahsûb olmak üzere nefs-i Galata ve tevâbi‘i ve nevâhîsinde vâki‘ değirmenlerin vech-i meşrûh üzere sâhiblerinin isimleri ve sıhhat-i vukū‘u üzere tahrîr ve defter eyleyüp tahsîli fermânım olan resmlerin yıl yürür değirmenlerin her bir gözünden senede seksener akçe mîrî ve on beşer akçe mübâşire vech-i maâş ve ve altı ay yürürlerinden kezâlik kırkar akçe mîrî ve yedişer akçe vech-i maâş alınmak üzere mübâşir-i mezbûr ma‘rifetiyle ber-vech-i ta‘cîl cem‘ ve tahsîl ve tahrîr ve defter etdirip kîseleyip ve mühürleyip yarar ve mu‘temedün-aleyh âdemler ile ta‘cîlen Dersaâdetime irsâl ve teslîm-i hazîne etdirmekde gereği gibi mukayyed olup itmâm-ı hizmetde bezl-i makdûr ve sa‘y-i nâ-mahsûr eyleyesiz el-hâsıl memâlik-i mahrûsemde vâki‘ olan değirmenlerin rüsûmları husûsuna min-ba‘d evkāf-ı selâtîn ve havâss-ı hümâyûn ve vüzerâ-yı izâm ve sultân hâsları zâbitleri ve voyvodaları ve zu‘amâ ve erbâb-ı timar sâhibleri ve sâir askerî tâifesin müdâhale etdirmeyip başka mukāta‘aya kayd olunup fermânım üzere tahrîr ve defter eyleyüp mübâşir-i merkūm ma‘rifetiyle ta‘cîlen cem‘ ve tahsîl etdirip ber-vech-i ta‘cîl Dersaâdetime irsâl ve teslîm-i hazîne etdiresiz avk ve te’hîrden ve ihmâl ve müsâheleden be-gāyet ihtirâz eyleyesiz şöyle ki fermânımdan ziyâde akçe aldığı mesmû‘-ı hümâyûnum olsa alanların ve aldıranların haklarından gelinir bilmiş olasınız ona göre basîret üzere olup fermânımdan ziyâde alınmakdan ve bazıları ketm etmeden, dâhil eylememekden ve hilâf-ı şer‘ ve kanun te‘addî ve tecâvüzden be-gāyet ihtirâz eyleyesiz vech-i meşrûh üzere olan emrim yerine getiresiz şöyle bilesiz alâmet-i şerîfe i‘timâd kılasız. Tahrîren fi’l-yevmi’t-tâsi‘ ve’l-ışrîn min-şehri Şevvâli’l-mükerrem li-sene isneteyn ve sittîn ve elf. Be-makāmı Kostantınıyyyeti’l-mahrûse