Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 82 Hüküm no: 6 Orijinal metin no: [1b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arabacı Bayezid mahallesinden Mehmed Nazmi’nin bağları ile ağaçlarını Todoş v. Avidnoş’a satması Bağ mübâya‘ası Mahmiye-i İslâmbol’da Arabacı Bâyezid mahallesinde sâkin es-Seyyid Mehmed Nazmi meclis-i şer‘-i hatîrde işbu bâ‘isü’r-rakīm Todoş v. Avidnoş nâm zimmî muvâcehesinde ikrâr ve takrîr-i kelâm edip yedimde mülküm olup Havâss-ı Refî‘a kazâsına muzâfe Büyük Çekmece nâhiyesine tâbi‘ Anarşa nâm karyede vâki‘ beyne’l-ahâli ve’l-cîrân ma‘lûmü’l-hudûd Fidyebağı ta‘bîr olunur bir dönüm kürûmu mülk bir kıt‘a ve kurbünde vâki‘ Horabağı ta‘bîr olunur iki dönüm kürûmu mülk bir kıt‘a ve Ortabağlar nâm mevzi‘de vâki‘ ma‘lûmü’l-hudûd tahmînen üç dönüm kürûmu mülk bir kıt‘a ki cem‘an üç kıt‘a bağlar ile sazlık ve ittisâlinde bayır ta‘bîr olunur mahâlde vâki‘ ma‘lûmü’l-aded asma ve incir ve sâir meyve eşcârlarımı tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile merkūm Todoş zimmîye yirmi beş guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yirmi beş guruşu merkūm yedinden tamamen ahz ü kabz eyledim, ba‘de’l-yevm zikr olunan emlâk merkūm Todoş zimmînin mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 7 Ramazan sene 1196 Şühûdü’l-hâl: Ahmed Beşe Berber, es-Seyyid İbrahim b. Numan, es-Seyyid Halil b. Numan, Mehteroğlu Ahmed, Yörükoğlu Hüseyin ve gayruhum.