Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 83 Hüküm no: 7 Orijinal metin no: [1b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koruk Mahmud mahallesinde vefat eden Emine bt. Halil’in vârislerinin tereke konusunda sulh olmaları Terekeden ibrâ Mahmiye-i İslâmbol’da Koruk Mahmud mahallesinde sâkine iken bundan akdem fevt olan Emine bt. Halil nâm hatunun verâseti zevc-i metrûkü Osman b. Mehmed ile vâlidesi Fatıma bt. Hüseyin nâm hatuna ve li-ebeveyn ammisi İbrahim b. Ali’ye münhasıra ve mesele-i mîrâsları altı sehm i‘tibârıyla üç sehmi zevci mezbûr Osman’a ve iki sehmi vâlidesi mezbûre Fatıma ve bir sehmi ammisi mezbûr İbrahim’e isâbeti tahakkukundan sonra mezbûr İbrahim meclis-i şer‘-i hatîrde tereke-i müteveffât-ı mezbûreye bi’l-verâse vâzı‘ü’l-yed olan işbu bâ‘isü’l-kitâb mezbûr Osman kendi nefsinden asîl ve mezbûre Fatıma tarafından husûs-ı âti’l-beyânı tasdîka vekîl olduğu ber-nehc-i şer‘î sâbit olmağla mezbûr mahzarında bi’l-verâse ikrâr ve takrîr-i kelâm edip mûrisem müteveffât-ı mezbûrenin hîn-i vefâtında yanında mevcûd mecmû‘ terekesiyle mahalle-i mezbûrede vâki‘ bir tarafdan Mehmed Çavuş menzili ve bir tarafdan Fatıma Hatun menzili ve bir tarafdan Hacı İbrahim Efendi menzili ve bir tarafdan tarîk-i âm ile mahmud ma‘lûmü’l-müştemilât bir bâb nısf menzilden ber-i‘tibâr-ı mezkûr bana isâbet eden bir sehm hissemi mezbûr Osman ile müvekkile-i mezbûreden bu esnâda taleb ve da‘vâya tesaddî etmişdim. El-hâletü hâzihî beynimize muslihûn tavassutuyla tesaddî eylediğim da‘vâ-yı mezkûremden beni mezbûr Osman ve müvekkile-i mezbûre ile üç yüz guruş üzerine inşâ-i akd-i sulh eylediklerinde ben dahi sulh-ı mezkûru kabûl ve bedel-i sulh olan meblağ-ı mezbûr üç yüz guruşu yedlerinden tamamen ahz ü kabz edip mûrise-i müteveffât-ı mezbûrenin cüz’î ve küllî ism-i mâl ıtlâk [olunur] mecmû‘ ve nısf menzil-i mezkûra ve bi’l-cümle hukūk-ı mîrâsa ve sâireye müte‘allika âmme-i de‘âvî ve kâffe-i mütâlebâtdan mezbûr Osman ile müvekkile-i mezbûre Fatıma Hatun’dan herbirinin zimmetlerini ibrâ ve ıskāt eylediğimde onlar dahi ibrâmı kabûl eylediler dedikde gıbbe’t-tasdîki’ş-şer‘î mâ-vaka‘a. Fî 10 N sene 1196 Şühûdü’l-hâl: Osman Çavuş b. el-Hâc Şaban, Mehmed Emin b. el-Hâc Halil, el-Hâc Ömer b. Şaban, Ahmed b. Mustafa, Ali b. Ebîbekir, Mustafa b. İbrahim, İbrahim b. Ahmed, Molla Ali b. Halil.