Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 84 Hüküm no: 9 Orijinal metin no: [2a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Davudpaşa mahallesinden Mustafa b. Süleyman’ın alacaklı olduğu Kahveci Mehmed Ağa ile sulh olması Ecr-i mislinden ibrâ Mahmiye-i İslâmbol’da Davudpaşa mahallesinde sâkin Mustafa b. Süleyman nâm kimesne meclis-i şer‘-i hatîrde işbu bâ‘isü’l-vesîka Kahveci Mehmed Ağa b. Süleyman mahzarında ikrâr ve takrîr-i kelâm edüp bundan akdem beher şehr üçer guruş ücret ve beher sene otuz guruş yıllık bahâ tesmiyeleriyle mezbûr Mehmed Ağa’ya bir buçuk sene mikdârı hizmetim sebk etmekle müddet-i merkūmede sebk eden hizmetimin ücret-i müsemmâ-yı mezkûresi elli dört guruşun yirmi yedi guruşunu yedinden ahz ü kabz edip bâkīsi olan yirmi yedi guruş yıllık bahâm olan kırk beş guruş ki cem‘an yetmiş iki guruşu bu esnâda mezbûr Mehmed Ağa’dan taleb ve da‘vâya tesaddî etmiştim. El-hâletü hâzihî beynimize muslihûn tavassutuyla tesaddî eylediğim da‘vâ-yı mezkûremden beni mezbûr Mehmed Ağa ile on guruş üzerine inşâ-i akd-i sulh eylediklerinde ben dahi sulh-ı mezkûru kabûl ve bedel-i sulh olan meblağ-ı mezbûr on guruşu yedinden ahz ü kabz edip matlûbumun mâ‘adâsı olan altmış iki guruşa ve bi’l-cümle husûs-ı mezkûra müte‘allika âmme-i de‘âvî ve kâffe-i mutâlebâtdan mezbûr Mehmed Ağa ile sulbî kebîr oğlu Mehmed Emin Efendi’den herbirinin zimmetlerini ibrâ ve ıskāt eylediğimde onlar dahi ibrâmı kabûl eylediler dedikde gıbbe’t-tasdîki’ş-şer‘î mâ-vaka‘a. Fî 8 Ramazan sene 1196 Şühûdü’l-hâl: Ali Ağa b. Mehmed Kapıkethudâsı, Molla Ali b. Halil, Salih b. Halil, Hacı Hasan b. Osman ve gayruhum.