Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 85 Hüküm no: 10 Orijinal metin no: [2a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. İbrahim’in Boyabad kazası Doğan köyündeki evi ile eşyalarını süt oğlu Çukadar Ömer Ağa’ya satması Anadolu’dan mübâya‘a-i menzil Mahmiye-i İslâmbol’da Koca Mustafa Paşa Câmi‘-i şerîfi kurbünde Canbaziye mahallesinde sâkine ve zâtı ta‘rîf-i şer‘î ile mu‘arrefe olan Âişe bt. İbrahim nâm hatun meclis-i şer‘-i şerîf-i enverde süd oğlu işbu bâ‘isü’l-kitâb Çukadâr Ömer Ağa b. Hasan nâm kimesne mahzarında ikrâr ve takrîr-i kelâm edip yedimde mülküm olan vilâyet-i Anadolu’da Boyabad kazâsına tâbi‘ Doğan nâm karyede vâki‘ ma‘lûmü’l-hudûd ve’l-müştemilât bir bâb menzil ile derûnunda mevcûd ve kıtık memlû dört şayak yasdık ve iki minder ve on vakıyye evân-ı nühâsiyemi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûr Ömer’e yirmi guruşa bey‘ ve temlik ve mahâllinde kabza taslît eylediğimde ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr yirmi guruşa ve târih-i kitâba gelince beynimizde cereyân eden sâir ahz ü i‘tâya ve bi’l-cümle hukūk-ı şer‘iyeye müte‘allika âmme-i de‘âvî ve kâffe-i mutâlebâtdan mezbûr Ömer’in zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde ol dahi ibrâmı kabûl eyledi, ba‘de’l-yevm menzil-i mahdûd-ı mezkûr ile eşyâ-i muharrere-i mezkûre mezbûr Ömer’in mülk-i müşterâsı ve hakk-ı sarfı olup benim kat‘a alâka ve medhalim kalmamışdır, mahâllinde mutasarrıf olsun dedikde gıbbe’t-tasdîki’ş-şer‘î mâ-vaka‘a. Fî 11 Şevvâl sene 1196 Şühûdü’l-hâl: Ömer Ağa b. Mahmud, Mustafa Çavuş Ağa b. Hüseyin, Çukadâr Hüseyin b. Receb, Hüseyin Beşe b. Mustafa, Mustafa Beşe b. Hüseyin, Bostancızâde Molla Osman, Mehmed tâbi‘-i Kethudâ Bey, Molla Ali b. Halil, Hafız Numan Efendi b. Süleyman ve gayruhum.