Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 85 Hüküm no: 11 Orijinal metin no: [2a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Denizabdal mahallesinden Gülbuy bt. Abdullah’ın eşyalarını, yanında kaldığı Hatem bt. Abdullah’a satması Eşyâ mübâya‘ası Husûs-ı âti’l-beyânın mahâllinde ketb ü tahrîri iltimâs olmağın savb-ı şer‘-i enverden irsâl olunan Mevlana Hafız Numan Efendi b. Süleyman mahmiye-i İslâmbol’da Şehremîni kurbünde Deniz Abdal mahallesinde kâin Hatem bt. Abdullah nâm hatunun müstecireten sâkine olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i âlî eyledikde menzil-i mezkûrede müsâfireten sâkine ve zâtı Müslimûn-ı merkūmûn ta‘rîfleriyle mu‘arrefe olan Gülbuy bt. Abdullah nâm hatun meclis-i ma‘kūd-ı mezkûrda mu‘arrefetü’z-zât işbu bâ‘isetü’l-kitâb mezbûre Hatem Hatun mahzarında ikrâr ve takrîr-i kelâm edip ben müsinne ve alîle olmamla mezbûre Hatem Hatun bir odasında beni iskân etmekle yedimde malım ve mülküm olan ancak bir çit döşek ma‘a şilte ve üç yemeni baş yasdığı ve üç yemeni yorgan ma‘a çârşeb ve bir çuka ferâce ve iki şali entari ve iki bez gömlek ma‘a don ve bir hamam tasına münhasıra olup bunlardan mâ‘adâ menzil-i mezkûrda mevcûd melbûsât ve mefrûşât ve evân-ı nühâsiye ve gayr-ı nühâsiye ve bi’l-cümle eşyâ-i sâire-i mezbûre Hatem Hatun’un mâlı ve mülkü olup benim kat‘a alâka ve medhalim olmamağın ben eşyâ-i muharrere-i mezkûremi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûre Hatem Hatun’a on beş guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr on beş guruş mutâlebesinden mezbûre Hatem Hatun’un zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde ol dahi ibrâmı kabûl eyledi, ba‘de’l-yevm eşyâ-i muharrere-i mezkûre mezbûre Hatem Hatun’un mülk-i müşterâsı ve hakk-ı sarfı olup benim aslâ alâka ve medhalim kalmamışdır dedikde gıbbe’t-tasdîki’ş-şer‘î vâki‘ hâli mevlana-yı mezbûr mahâllinde ketb ü tahrîr, ba‘dehû mâ‘an ba‘s olunan ümenâ-yı şer‘le meclis-i şer‘a gelip alâ-vukū‘ıhî inhâ ve takrîr etmeğin mâ-vaka‘a bi’t-taleb. Fî 8 min-Şevvâli’l-mükerrem sene 1196 Şühûdü’l-hâl: Ahmed Ağa b. Yusuf Vezîr Ağası, es-Seyyid Mehmed b. Mahmud, Ahmed Ağa b. Osman, Saka Ömer Beşe b. Mehmed, Molla Ali b. Halil, Süleyman b. Mehmed.