Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 87 Hüküm no: 13 Orijinal metin no: [2b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçü Hüseyin mahallesinden Ayşe bt. Süleyman’ın eşyalarını oğlu Bostanî Mehmed Arif’e satması Eşyâ mübâya‘ası Mahmiye-i İslâmbol hısnı ebvâbından Yedikule dâhilinde Kürkçü el-Hâc Hüseyin mahallesinde sâkine Âişe bt. Süleyman nâm hatun tarafından husûs-ı âti’l-beyânı ikrâra vekîl olduğu zât-ı mezbûreyi ârifân Nasuh b. Halil ve el-Hâc İbrahim b. Salih nâm kimesneler şehâdetleriyle sâbit olan el-Hâc Ahmed Ağa b. Hüseyin nâm kimesne meclis-i şer‘-i hatîr-i lâzımü’t-tevkīrde müvekkile-i mezbûrenin sulbî kebîr oğlu işbu bâ‘isü’l-kitâb Bostânî Mehmed Ârif b. el-Hâc Mustafa nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûr[e] Âişe Hatun ancak yedinde mâlı olan bir çift altın kuşağını târih-i kitâbdan altı ay mukaddem hibe-i sahîha-i şer‘iye ile oğlu mezbûr Mehmed Ârif’e hibe ve temlik ve teslîm eylediğinde ol dahi târih-i mezbûrda bilâ-mâni‘ ittihâb ve temellük ve tesellüm ve kabz ü kabûl eyledikden sonra eşyâ-i sâire-i memlûkesinden bâ-defter-i müfredât otluk memlû altı çatma yasdık ve yün memlû iki minder ve bir beledî döşek ma‘a şilte ve bir yemeni baş yasdığı ve iki basma yorgan ve bir zenne şerîtli şalî biniş ve biri bogasi ve biri Şam alacası iki entari ve bir çiçekliye kablı kākum kürkünü târih-i mezbûrda tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile oğlu mezbûr Mehmed Ârif’e seksen guruşa bey‘ ve temlik ve teslîm eylediğinde ol dahi ber-minvâl-i muharrer târih-i mezbûrda iştirâ ve temellük ve tesellüm ve kabûl eyledikden sonra semeni olan meblağ-ı mezbûr seksen guruş mütâlebesinden müvekkilem mezbûre Âişe Hatun oğlu mezbûr Mehmed Ârif’in zimmetini ibrâ-i âmm-ı kātı‘u’n-nizâ‘la ibrâ ve ıskāt eyledikde ol dahi ibrâsını kabûl edip ol-vechile zikr olunan bir çift altın kuşak târih-i mezbûrdan beri oğlu mezbûr Mehmed Ârif’in mülk-i mevhûbu ve eşyâ-i sâire-i muharrere-i mezkûre dahi mülk-i müşterâsı ve hakk-ı sarfı olup müvekkilem mezbûre Âişe Hatun’un kat‘a alâka ve medhali kalmamışdır dedikde gıbbe’t-tasdîki’ş-şer‘î mâ-vaka‘a. Fî 8 min-L sene 1196 Şühûdü’l-hâl: Es-Seyyid Hüseyin b. Mustafa, Memiş b. Mustafa, Nasuh b. Halil, el-Hâc İbrahim b. Salih, Molla Ali b. Halil, el-Hâc Hasan b. Osman ve gayruhum.