Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 89 Hüküm no: 16 Orijinal metin no: [2b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Timur mahallesinden Ağya v. Bagonid’in vârislerinin birbirlerinin zimmetlerini ibra etmeleri Mîrâsdan ibrâ Mahmiye-i İslâmbol’da el-Hâc Timur mahallesinde mütemekkin iken bundan akdem hâlik olan Ağya v. Bagonid nâm zimmînin verâseti a[na]sı Anna bt. Kirkor Nasrâniye ile li-ebeveyn ammisi Varsam v. Mıgırdıç nâm zimmîye münhasıra ve mesele-i mîrâsları üç sehm i‘tibârıyla bir sehm anası mersûme Anna Nasrâniye ve iki sehmi merkūm Varsam zimmîye isâbeti tahakkukundan sonra mesfûr Varsam zimmî meclis-i şer‘-i şerîf-i enverde hâlik-i mesfûrun terekesine bi’l-verâse vâzı‘atü’l-yed olup şahsı vech-i şer‘î üzere mu‘arrefe olan işbu bâ‘isetü’r-rakīm mersûme Anna Nasrâniye muvâcehesinde bi’l-verâse ikrâr ve takrîr-i kelâm edip mûrisim hâlik-i mesfûr Ağya zimmînin hîn-i helâkinde yanında mevcûd mecmû‘ terekesine anası mersûme Anna Nasrâniye bi’l-verâse vâzı‘atü’l-yed olmağla mûrisim hâlik-i mesfûrun terekesinden i‘tibâr-ı mezkûr üzere bana isâbet eden iki sehm hisse-i irsiyemi ben bu esnâda mersûme Anna Nasrâniyeden taleb ve da‘vâya tesaddî eylediğimde ol dahi cevâbında oğlum hâlik-i mesfûrun düyûnu terekesinden ezyed olduğu hâlde hâlik olup mecmû‘u terekesini dâyinleri ahz ü istifâ etmişler idi deyü beni def‘e tesaddî ve bu [ve]chile beynimizde münâza‘ât-ı kesîre ve muhâsamât-ı şedîde cereyân etmişidi. El-hâletü hâzihî hakīkat-i hâl mersûme Anna Nasrâniyenin bi’l-cümle takrîr-i meşrûhası üzere olduğuna ilmim lâhık olmağla ben ber-vech-i muharrer tesaddî eylediğim da‘vâ-yı mezkûreden meccânen fâriğ olup mûrisim hâlik-i mesfûrun terekesine ve bi’l-cümle husûs-ı mezkûra müte‘allika âmme-i de‘âvî ve kâffe-i mutâlebâtdan mersûme Anna Nasrâniyenin zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde ol dahi ibrâmı kabûl eyledi dedikde gıbbe’t-tasdîki’ş-şer‘î mâ-vaka‘a. Fî 9 Ramazan sene 1196 Şühûdü’l-hâl: Molla Ali b. Halil, Salih b. Halil, Hacı Hasan b. Osman, Yusuf b. Hasan, Ağya v. Kirkor, Markar v. Onan, Agop v. Kirkor, David v. David, Avadik v. Melkon, Kirkor v. Serabet ve gayruhum.