Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 89 Hüküm no: 17 Orijinal metin no: [3a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin mahallesinden Foti ve Sofiye’nin mülkleri olan arsalarını kiraya vermeleri Îcâr-ı arsa Mahmiye-i İslâmbol’da Samatya Kapısı dâhilinde el-Hâc Hüseyin mahallesinde mütemekkine olup şahısları ta‘rîf-i şer‘î ile mu‘arrefe olan Foti ve Sofiye bintey Petro nâm kız karındaşlar meclis-i şer‘-i hatîr-i lâzımü’t-tevkīrde Şerbetçi tâifesinden işbu ashâbü’r-rakīm Pandazi v. Petro ve Anaştaş v. Anaştaş nâm zimmîler kendi nefislerinden asîl ve Praşkova v. Arziya ve Hürmüz v. Anaştaş nâm zimmîler taraflarından husûs-ı âti’l-beyânı tasdîka vekîlleri olduğu nehc-i şer‘î ve tarîk-i mer‘î üzere sâbit olan mesfûr Anaştaş zimmî muvâcehelerinde herbiri ikrâr ve takrîr-i kelâm edip yedimizde mülkümüz olan mahalle-i mezbûrede vâki‘ bir tarafdan Kürkçü Ezmerağda Nasrâniyenin muhterik menzil arsası ve bir tarafdan şerbethâne ve bir tarafdan kal‘a duvarı ve bir tarafdan tarîk-i âm ile mahdûd ve kiremid pûşîdeli bir bâb bârgir âhûru arsasını târih-i vesîkadan beher sene seksener guruş ücret tesmiyesiyle mesfûrân Pandazi ve Anaştaş zimmîler ile müvekkilân-ı mesfûrân Praşkova ve Hürmüz zimmîler[e] ale’l-iştirâki’s-seviyy îcâr ve teslîm eylediğimizde onlar dahi ber-vech-i muharrer istîcâr ve tesellüm ve kabûl edip lâkin âhûr-ı mezkûrun ebniyesi tekmîl olmayıp nâkıs olmağla mesfûrân Pandazi ve Anaştaş zimmîler ile müvekkilân-ı mesfûrân Praşkova ve Hürmüz zimmîler âhûr-ı mezkûrun ebniyesini tekmîl etmek üzere mâllarından üç yüz guruş dahi sarf edip eğer ba‘de zamânin biz fesh-i akd-i icâre edip mesfûrân Pandazi ve Anaştaş zimmîler ile müvekkilân-ı mesfûrân Praşkova ve Hürmüz zimmîleri âhûr-ı mezkûrdan ihrâc eder isek meblağ-ı masrûf-ı mezkûr üç yüz guruşu kendülere tamamen edâya ve yine ke’l-evvel ahur olmak üzere terk ve ibkāya ta‘ahhüd eyledik eylediklerini mesfûrân Pandazi ve Anaştaş zimmîler asâleten ve vekâleten tasdîk ve tahkīk etmeleriyle vâki‘ü’l-hâl hıfzen li’l-makāl bi’t-taleb ketb olundu. Fî 25 min-Şa‘bâni’l-mu‘azzam sene 1196 Şühûdü’l-hâl: Molla Ali b. Halil, Hacı Hasan b. Osman, İsmail Çavuş, Mustafa Ağa b. ( ) Kolancı, Berber Süleyman b. ( ), Salih b. Halil, Haffâf Hürmüz, Kuyumcu Yorgo, Kürkçü Fotaki, Nikola, Yorgo Bağçevân, Kürkçü Dimitri, diğer Dimitri Kürkçü, Terzi Praşkova, Tofilo Şerbetçi ve gayruhum.