Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 90 Hüküm no: 18 Orijinal metin no: [3a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koca Mustafa Paşa mahallesinden Rukiye bt. Abdullah’ın Hadice bt. Halil’deki alacağını alarak zimmetini ibra etmesi Ecr-i mislinden ibrâ Mahmiye-i İslâmbol’da Koca Mustafa Paşa mahallesinde sâkine ve zâtı vech-i şer‘î üzere mu‘arrefe olan Rukiye bt. Abdullah nâm bikr-i bâliğa meclis-i şer‘-i şerîf-i enverde kezâlik zâtı mu‘arrefe olan işbu bâ‘isetü’l-vesîka Hadice bt. Halil nâm dellâke mahzarında ikrâr ve takrîr-i kelâm edüp ben mezbûre Hadice Hatun’un talebiyle târih-i kitâba gelince bir sene mikdârı bilâ-tesmiyeti’l-ücre mahalle-i mezbûrede vâki‘ hamamda dellâkelik hizmetinde olmamla mezbûre Hadice Hatun müddet-i mezkûrede sebk eden hizmetim mukābelesinde yedinde mâlı ve mülkü olan iki çuka ferâce ve bir şali entari ve def‘a iki müsta‘mel şali entari ve üç gömlek ve üç don ve üç uçkur ve bir zıbın ve bir şali cübbe ve bir basma kuşak ve üç değirmi yemeni ve bir yaşmak ma‘a makrame ve bir yemeni yorgan ma‘a çârşeb ve bir döşek çârşebi ve bir yemeni baş yasdığını bana def‘ ü teslîm eyledikde ben dahi bi-a‘yânihâ yedinden tamamen ahz ü kabz edüp müddet-i mezkûrede sebk eden hizmetimin ecr-i misline müte‘allika âmme-i de‘âvî ve kâffe-i mutâlebât ve eymân ve muhâsamâtdan mezbûre Hadice Hatun’un zimmetini ibrâ-i âm ile ibrâ ve ıskāt eylediğimde ol dahi ibrâmı kabûl eyledi dedikde gıbbe’t-tasdîki’ş-şer‘î. Fî 14 min-Ramazani’l-mübârek sene 1196 Şühûdü’l-hâl: Mehmed Salih Efendi b. İbrahim, Molla Ali b. Halil, Hacı Hasan b. Osman, Mustafa b. Mustafa, es-Seyyid İsa b. ( ) ve gayruhum.