Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 91 Hüküm no: 19 Orijinal metin no: [3a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mimaracem mahallesinden Zeyneb bt. Abdullah’ın kocasından boşanması Muhâla‘a Mahmiye-i İslâmbol’da Mi‘mâr Acem mahallesinde sâkine ve zâtı ta‘rîf-i şer‘î ile mu‘arrefe olan Zeyneb bt. Abdullah nâm zenciye meclis-i şer‘-i şerîf-i enverde zevc-i dâhili işbu bâ‘isü’l-vesîka el-Hâc Ahmed b. Abdullah nâm kimesne mahzarında ikrâr ve takrîr-i kelâm edip mezbûr el-Hâc Ahmed zevcim olup lâkin beynimizde hüsn-i mu‘âşeretimiz olmamağla ben hul‘a tâlibe olduğum ecilden zevcim mezbûrun zimmetinde mütekarrer ve ma‘kūdun-aleyh olan otuz guruş mehr-i müeccelimin on guruşunu zevcim mezbûr el-Hâc Ahmed’in yedinden ahz ü kabz edip bâkī yirmi guruş mehr-i müeccelim ile nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr el-Hâc Ahmed ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete müte‘allika âmme-i de‘âvî ve kâffe-i mutâlebâtdan ben zevcim mezbûr el-Hâc Ahmed’in zimmetini ibrâ-i âm ile ibrâ ve ıskāt eylediğimde ol dahi kezâlik hukūk-ı zevciyete müte‘allika âmme-i da‘vâdan benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 18 min-Şevvâl sene 1196 Şühûdü’l-hâl: Yağlıkçı Hüseyin Çelebi b. ( ) Muhzır, Muhzır Ahmed b. Mehmed, Molla Mehmed b. Mustafa, Çukadâr Ali Ağa b. Mehmed, Molla Ali b. Halil, el-Hâc Ali b. el-Hâc Ahmed ve gayruhum.