Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 91 Hüküm no: 20 Orijinal metin no: [3a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçübaşı mahallesinden Fatma bt. Ahmed’in kendisini boşayan Osman b. Süleyman’dan nafaka alması Hammâliye Mahmiye-i İslâmbol’da Topkapısı dâhilinde Kürkçübaşı mahallesinde sâkine ve zâtı vech-i şer‘î üzere mu‘arrefe olan işbu bâ‘isetü’l-kitâb Fatıma bt. Ahmed nâm hatun meclis-i şer‘-i şerîf-i enverde zevc-i mutallıkı Osman b. Süleyman mahzarında takrîr-i kelâm ve ta‘bîr ani’l-merâm edip zevc-i mutallıkım mezbûr Osman’ın firâşından hâsıl hamlim olmağla vaz‘-ı haml ile iddetim münkaziye oluncaya değin nafaka ve meûnet-i süknâm içün zevc-i mutallıkım mezbûr üzerine kıbel-i şer‘den kadr-ı ma‘rûf meblağ farz ve takdîr olunmak matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb -tûbâ-lehû ve hüsnü-meâb- efendi hazretleri dahi mezbûre Fatıma Hatun’un vaz‘-ı haml ile iddeti münkaziye oluncaya değin nafaka ve meûnet-i süknâsı içün zevc-i mutallıkı mezbûr üzerine bi’t-terâzî târih-i kitâbdan küllü yevm dörder para farz ve takdîr buyurup meblağ-ı mefrûz-ı mezkûru mezbûre Fatıma Hatun kendi nafaka ve kisvesine harc ü sarfa ve vakt-i zarûretde istidâneye ve inde’z-zafer zevc-i mutallıkı mezbûr Osman üzerine rücû‘a mezbûre Fatıma Hatun’a izin vermeğin mâ-vaka‘a. Fî 2 Zilka‘de sene 1196 Şühûdü’l-hâl: Ahmed b. Mustafa, Mehmed b. Mehmed, Molla Ali b. Halil, Ali b. Mehmed, Hacı Hasan b. Osman.