Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 92 Hüküm no: 21 Orijinal metin no: [3b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alifakih mahallesinden Şerife Rabia bt. Mustafa’nın kocasından boşanması Muhâla‘a Mahmiye-i İslâmbol’da Ali Fakih mahallesinde sâkine ve zâtı vech-i şer‘î üzere mu‘arrefe olan Şerife Rabia bt. Mustafa nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb Mehmed Said b. Halil mahzarında ikrâr ve takrîr-i kelâm edip mezbûr Mehmed Said zevcim olup lâkin beynimizde hüsn-i mu‘âşeretimiz olmamağla iki def‘a akidde zimmetinde mütekarrer ve ma‘kūdun-aleyh olan kırk guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Mehmed Said ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve zevcim mezbûrdan matlûbum olan cihet-i karzdan elli guruşa ve bi’l-cümle hukūk-ı sâireye müte‘allika âmme-i de‘âvî ve kâffe-i mutâlebâtdan zevcim mezbûr Mehmed Said’in zimmetini ibrâ ve ıskāt eylediğimde ol dahi kezâlik hukūk-ı zevciyete ve sâire müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî-selhi Şevvâl sene 1196 Şühûdü’l-hâl: Molla Ali b. Halil, Salih b. Halil, Ali Ağa b. Mehmed, Mustafa b. Mustafa.