Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 93 Hüküm no: 22 Orijinal metin no: [3b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâtib Muslihiddin mahallesinden Ritaye Hatun’un mahalle mescidi kayyumuna meşrûta olup yanmış olan vakıf evin enkazının Halil b. Şaban’a satılması ve arsasının da kiraya verilmesi İstihkâm Abdülbâki Efendi gününde tahrîr olunmuşdur. Mûmâ-ileyhin imzâsıyladır. Mahmiye-i İslâmbol’da Altımermer kurbünde Kâtib Muslihiddin mahallesinde vâki‘ ashâb-ı hayrâtdan Ritaye Hatun bt. Abdülmennan’ın tevliyet ve gallesi mahalle-i mezbûre mescid-i şerîfine kayyum olanlara meşrûta vakfı olup mahalle-i mezbûrede kâin bir tarafdan Timurhan Vakfı’ndan menzil arsası ve bir tarafdan müte’ehhilîn odaları ve bir tarafdan Ahmed Efendi menzili arsası ve bir tarafdan tarîk-i âm ile mahdûd bi-hesâbı terbî‘i dört yüz otuz yedi zirâ‘ menzilin meşrûtiyet üzere mütevellîsi mahalle-i mezbûre mescidinde kayyum olan Hafız Mehmed Efendi b. Mustafa meclis-i şer‘-i şerîf-i enverde bi’t-tevliye takrîr-i kelâm ve bast-ı merâm edip menzil-i mezkûr ber-vech-i muharrer tevliyet ve gallesi benim kayyum olduğum mârrü’z-zikr Kâtib Muslihiddin Mescid-i şerîfi kayyumuna meşrûta merhûme-i mezbûrenin vakfı iken bu esnâda vâki‘ olan harîkde muhterik olup ancak hükm-i nukzda bir mikdâr taş ve bir su kuyusundan arsa-i sırfa kalmağla arsa-i mezkûre üzerinde vakıf içün icâre-i mu‘accelesine mahsûben müceddeden binâya kimesne rağbet etmeyip benim dahi binâya iktidârım olmamağın hükm-i nukzda sâlifü’z-zikr bir mikdâr taş ve su kuyusu ve sâir enkāz-ı mevcûde zeyl-i kitâbda muharrerü’l-esâmî olup ebniye ve nukz ahvâline vukūf-ı tamları olan bî-garaz Müslimîn tahmînleriyle zâhir olan elli guruş kıymet-i misliyesine bey‘ ve beher şehr otuz akçe icâre-i müeccele ile üzerine müceddeden ihdâs olunan ebniye bânîsinin mülkü olmak üzere taraf-ı vakıfdan bi-hasebi’t-tevliye binâya izin verilmek cânib-i vakf-ı mezbûra her vechile evlâ olmağın vech-i meşrûh üzere kıbel-i şer‘den bana izin verilmek matlûbumdur dedikde fi’l-hakīka kaziyye mütevellî-i mezbûrun bi’l-cümle bâlâda bast ü beyân eylediği minvâl üzere olduğu Müslimûn-ı mezbûrûn ihbârlarıyla lede’ş-şer‘i’l-enver zâhir olup mûcebince mütevellî-i mezbûra kıbel-i şer‘den izin verildikden sonra mütevellî-i mezbûr Hafız Mehmed Efendi yine meclis-i şer‘de işbu bâ‘isü’l-kitâb Halil b. Şaban mahzarında ikrâr ve takrîr-i kelâm edip menzil-i muhterik-i mezkûr arsasında mevcûd hükm-i nukzda olan bir mikdâr taş ve su kuyusu ve sâir enkāz-ı mevcûdesini tarafeynden îcâb ve kabûlü hâvî bey‘-i kat‘î ile mezbûr Halil’e kıymet-i misliyesi olan meblağ-ı mezbûr elli guruşa bi’t-tevliye bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr elli guruşu cânib-i vakf içün yedinden ahz ü kabz edip nukz-ı mezkûr mezbûr Halil’in mülk-i müşterâsı olduktan sonra ben menzil-i mezkûr arsasını senevî üç yüz altmış akçe icâre-i maktû‘a ile cânib-i vakfdan bi’t-tevliye mezbûr[a] îcâr ve teslîm ve arsa-i mezkûre üzerinde mâlıyla nefsi içün mülkiyet üzere binâya cânib-i vakfdan kendüye izin verip mümzâ ve mahtûm yedine temessük i‘tâ eyledim dedikde gıbbe’t-tasdîki’ş-şer‘î mâ-vaka‘a. Fî 24 min-şehri Ramazani’l-mübârek sene 1196 Şühûdü’l-hâl: Es-Seyyid Ali Efendi b. es-Seyyid Mehmed Emin İmâm-ı mahalle-i mezbûre, Mehmed Emin Efendi İmâm-ı mahalle-i Seyyid Ömer, el-Hâc Mehmed b. Mehmed Müezzin, Mustafa Ağa b. Ahmed, Hafız Numan Efendi b. Süleyman, es-Seyyid Molla Mahmud b. Ali, Mehmed Beşe b. Ali ve gayruhum.