Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 94 Hüküm no: 23 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mimaracem mahallesinden Ümmügülsüm bt. Ali’nin iki adet arsasını Saliha Hatun’a satması Arsa mübâya‘ası Mahmiye-i İslâmbol’da Mi‘mâr Acem mahallesinde sâkine ve zâtı ta‘rîf-i şer‘î ile mu‘arrefe olan Ümmügülsüm bt. Ali nâm hatun meclis-i şer‘-i şerîf-i enverde işbu bâ‘isetü’l-kitâb Saliha Hatun bt. İbrahim Efendi’nin sadrî kebîr oğlu ve tarafından husûs-ı âti’l-beyânı tasdîka vekîl olduğu ber-nehc-i şer‘î sâbit olan Köprülüzâde Vakfı kâtibi fahrü’l-emâsil ve’l-akrân Mustafa Efendi b. Ali mahzarında ikrâr ve takrîr-i kelâm edip mahmiye-i mezbûrede Sarı Nasuh mahallesinde vâki‘ bir tarafdan vekîl-i mezbûr Mustafa Efendi menzili ve bir tarafdan ba‘zen Hacı İbrahim Ağa menzili ve ba‘zen Câmeşûycu Ali Beşe bağçesi ve bir tarafdan ba‘zen Bostânî Süleyman Ağa bağçesi ve ba‘zen Yusuf Ağa menzili ve bir tarafdan tarîk-i âm ile mahdûd ma‘lûmu’z-zirâ‘ bir bâb muhterik menzil arsasının mahmiye-i mezbûrede Öksüzce mahallesinde imâm olanlara senede doksan akçe mukāta‘alı enkāz-ı mevcûdesiyle mâ‘adâ dört yüz yetmiş altı buçuk zirâ‘ arsa benim yedimde mülküm olup ben mârrü’z-zikr mukāta‘alı arsa ile dört yüz yetmiş altı buçuk zirâ‘ mülk arsadan vekîl-i mezbûr Mustafa Efendi tarafından üç yüz elli zirâ‘ mahâllini ifrâz ve alâmât-ı fâsıla vaz‘ıyla ba‘de’l-imtiyâz arsa-i mezkûreleri tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile müvekkile-i mezbûre Saliha Hatun’a yüz elli guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yüz elli guruşu müvekkile-i mezbûre Saliha Hatun yedinden tamamen ahz ü kabz eyledim, ba‘de’l-yevm arsa-i mezkûreler müvekkile-i mezbûre Saliha Hatun’un mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 11 min-Şevvâli’l-mükerrem sene 1196 Şühûdü’l-hâl: İsmail Efendi b. Abdullah İmâm-ı mahalle-i Sarı Nasuh, Dellâl Ali Efendi b. Mehmed, Molla Ahmed b. Ahmed, Ahmed b. Mustafa, İbrahim Beşe b. Mustafa Yorganî, Süleyman Ağa b. Mustafa, Molla Ali b. Halil, el-Hâc Hasan b. Osman, Mustafa b. Mustafa, Hüseyin Efendi b. İbrahim ve gayruhum.