Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 95 Hüküm no: 24 Orijinal metin no: [4a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Mustafa’nın küçük kızı Hadice’yi, bakmak şartıyla Fatma Hatun’a kiraya vermesi Îcâr ve istîcâr Fi’l-asl vilâyet-i Anadolu’da Bigadiç kasabası ahâlisinden olup mahrûse-i Galata’ya muzâfe Beşiktaş kasabasında sâkin Hadice nâm sagīrenin babası ve velîsi Mehmed b. Mustafa nâm kimesne meclis-i şer‘-i şerîf-i enverde zâtı vech-i şer‘î üzere mu‘arrefe olan işbu bâ‘isetü’l-vesîka Fatıma Hatun bt. Receb mahzarında bi’l-velâye ikrâr ve takrîr-i kelâm edip kızım sagīre-i mezbûre Hadice’nin kendüyü infâk eder mâlı olmayıp ve benim dahi infâk ve iksâya kudretim olmamağla kızım sagīre-i mezbûre ücret ile âhara îcâr ve ücreti nafaka ve kisvesine harc ü sarf olunmak hakkında evlâ olmağla kızım sagīre-i mezbûreyi işbu târih-i kitâbdan küllü yevm altışar para ücret ile mezbûre Fatıma Hatun’a bi’l-velâye îcâr ve teslîm ve ücret-i mezkûresini kızım sagīre-i mezbûrenin nafaka ve kisvesine harc ü sarfa mezbûre Fatıma Hatun’a emr ve tarafımdan tevkîl eylediğimde ol dahi ber-minvâl-i muharrer istîcâr ve tesellüm ve kabûl edip ücret-i mezkûresini kızım sagīre-i mezbûrenin nafaka ve kisvesine harc ü sarfa ta‘ahhüd eyledi dediğini mezbûre Fatıma Hatun tasdîk etmeğin mâ-vaka‘a bi’t-taleb ketb olundu. Fî-gurreti min-Zilka‘de sene 1196 Şühûdü’l-hâl: Mustafa b. Mehmed, Ali Ağa b. Mehmed, Molla Ali b. Halil, el-Hâc Hasan b. Osman, Molla Mustafa b. Mustafa, Hüseyin Çelebi Muhzır, Molla Mehmed b. Mustafa ve gayruhum.