Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 97 Hüküm no: 28 Orijinal metin no: [4b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aydın Kethuda mahallesinden Ali Çavuş Ağa’nın yanan dükkânlarının arsasını Zeynelabidin Efendi’ye satması Arsa mübâya‘ası Mahmiye-i İslâmbol’da Aydın Kethudâ mahallesinde sâkin el-Hâc Ali Çavuş Ağa b. Abdullah nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-vesîka es-Seyyid el-Hâc Zeynelabidin Efendi b. es-Seyyid eş-Şeyh Halil Efendi mahzarında ikrâr-ı tam ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye yedimde mülküm ve hakkım olan mahmiye-i mezbûrede Seyyid Ömer mahallesinde vâki‘ Küçük Hamam kurbünde kâin iki tarafdan Numan Ağa veresesi ve İbrahim Ağa tasarruflarından olan bostan ve dekâkin arsası ve iki tarafdan tarîk-i âm ile mahdûd birbirine muttasıl beş aded kahve ve bir sandalcı ve bir berber dekâkini ki cem‘an yedi bâb muhterik mülk dekâkin arsamı tarafeynden îcâb ve kabûlü hâvî bey‘-i bâtt-ı sahîh-i şer‘î ve bi-safkatin vâhidetin mezbûr es-Seyyid el-Hâc Zeynelabidin Efendi’ye yüz otuz üç guruş beş paraya bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı merkūm yüz otuz üç guruş beş parayı mezbûr es-Seyyid el-Hâc Zeynelabidin Efendi yedinden tamamen ahz ü kabz eyledim, ba‘de’l-yevm zikr olunan yedi bâb dekâkin arsası mezbûr es-Seyyid el-Hâc Zeynelabidin Efendi’nin mülk-i müşterâsı ve hakk-ı sarfı olup benim aslâ alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Şevvâli’l-mükerrem sene sitte ve tis‘în ve mi’e ve elf. Şühûdü’l-hâl: Za‘îm Halil Ağa b. Mehmed, Müezzin Halil Efendi b. Mustafa, Kahveci Mehmed Ağa b. Hasan, Çukadâr Ali, Molla Ali b. Halil, Hamâmî el-Hâc İbrahim Ağa b. el-Hâc Mustafa ve gayruhum.