Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 97 Hüküm no: 29 Orijinal metin no: [5a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alifakih mahallesinden Nefise bt. Abdullah’ın kocasına mehr-i müeccelini hibe etmesi ve bir takım eşyalarını da satması Eşyâ mübâya‘ası Mahmiy-i İslâmbol’da Ali Fakih mahallesinde sâkine Nefise bt. Abdullah nâm hatun tarafından husûs-ı âti’l-beyânı ikrâra vekîl olduğu zât-ı mezbûreyi ârifân İbrahim Beşe b. Mehmed ve Mustafa Beşe b. Mustafa nâm kimesneler şehâdetleriyle sâbit olan Mustafa Beşe b. Hüseyin nâm kimesne meclis-i şer‘-i şerîf-i enverde müvekkile-i mezbûrenin hâlâ zevci işbu bâ‘isü’l-kitâb İbrahim Beşe b. Mehmed nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Nefise Hatun zevcim mezbûr İbrahim Beşe zimmetinde ma‘kūdun-aleyh olan on beş guruş mehr-i müeccelimi târih-i kitâbdan iki ay mukaddem hibe-i sahîha-i şer‘iye ile zevcim mezbûr İbrahim Beşe’ye hibe ve temlik eylediğimde ol dahi târih-i mezbûrede ber-vech-i muharrer ittihâb ve temellük ve kabûl eyledikden sonra eşyâ-i sâire-i memlûkemden bâ-defter-i müfredât yün memlû üç minder ve kıtık memlû altı çatma yasdık ve bir yeşil çuka ferâce ve bir yaşmak ma‘a makrame ve bir çiçekli entari ve bir iplik alacası entari ve bir beyaz sandal hırka ve bir takım hamam rahtı ve bir çift yorgan ma‘a çârşeb ve bir tahta sandık ve bir sepet sandığımı dahi yine târih-i mezbûrede tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile zevcim mezbûr İbrahim Beşe’ye on beş guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan on beş guruş mutâlebesinden zevcim İbrahim Beşe’nin zimmetini ibrâ-i âm ile ibrâ ve ıskāt eylediğimde ol dahi ibrâmı kabûl etmeğin ol-vechile târih-i mezbûrdan beri mehr-i mezkûr on beş guruşdan zevcim mezbûr İbrahim Beşe’nin zimmeti berî ve eşyâ-i muharrere-i mezkûre dahi mülk-i müşterâsı ve hakk-ı sarfı olup benim aslâ alâka ve medhalim kalmamışdır dedi dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 20 min-Şevvâl sene [1]196 Şühûdü’l-hâl: İsmail Efendi İmâm-ı mahalle-i mezbûre, Hafız Mehmed Efendi Müezzin, Mehmed Yazıcı b. Abdullah, Şehrî Ahmed Ağa b. Abdullah, Mustafa Usta b. Yusuf, Osman Beşe b. Osman, Börücü Ebûbekir Beşe b. Mahmud, Molla Ali b. Halil, Hacı Hasan b. Osman ve gayruhum.