Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 98 Hüküm no: 30 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koca Mustafa Paşa mahallesinden Mehmed Çelebi’nin memleketindeki ev, bağ ve tarlalarını satmak üzere Kasım Beşe’ye vekâlet vermesi Vekâlet Vilâyet-i Anadolu’da Andırı kazâsına tâbi‘ Ortaköy ahâlisinden olup mahmiye-i İslâmbol’da Koca Mustafa Paşa mahallesinde sâkin es-Seyyid Mehmed Çelebi b. es-Seyyid Ahmed nâm kimesne meclis-i şer‘-i şerîf-i enverde işbu bâ‘isü’l-vesîka Kasım Beşe b. Mustafa nâm kimesne mahzarında ikrâr-ı tam ve takrîr-i kelâm edip yedimde mülküm olup mârrü’z-zikr Ortaköy’de vâki‘ bir tarafdan Nasreddin menzili ve bir tarafdan Sirkecioğlu menzili ve iki tarafdan tarîk-i âm ile mahdûd ma‘lûmü’l-müştemilât bir bâb mülk menzil ve yine zikr olunan Ortaköy’de kâin debbâğhâne karşısında vâki‘ ve bir tarafdan İmâm sağırı tarlası ve bir tarafdan Osman bağı ve bir tarafdan Mehmed tarlası ve bir tarafdan tarîk-i âm ile mahdûd tahmînen ( ) dönüm mikdârı bir kıt‘a ve yine mârrü’z-zikr Ortaköy’de Cellemedin nâm mahâlde kâin bir tarafdan Demirci Halil bağı ve bir tarafdan Molla Alioğlu bağı ve bir tarafdan Salihoğlu bağı ve bir tarafdan Berber bağı ile mahdûd bir kıt‘a ki cem‘an bir bâb mülk menzilim ile iki kıt‘a kürûmu mülk bağlarımı ve yine mârrü’z-zikr Ortaköy toprağında kâin taht-ı tasarrufumda olan lede’l-ahâli ve’l-cîrân ma‘lûmü’l-hudûd üç kıt‘a tarlalarımı dahi semen ve bedel-i misilleriyle âhara bey‘ ve ferâğa ve semen ve bedellerini ahz ü kabza ve bana îsâle ve teslîme ve husûs-ı mezkûr mütevakkıf olduğu umûrun küllîsine tarafımdan mezbûr Kasım Beşe’yi vekîl ve nâib-i menâb nasb ü ta‘yîn eyledim dedikde mezbûr Kasım Beşe dahi vekâlet-i mezkûreyi kabûl ve hizmet-i lâzımesin edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 21 min-Şevvâl sene 1196 Şühûdü’l-hâl: Es-Seyyid Mehmed Çelebi b. Osman, Aylancıoğlu Ali Beşe b. ( ), Molla Ali b. Halil, Molla Mehmed b. Mustafa ve gayruhum.