Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 99 Hüküm no: 31 Orijinal metin no: [5a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cafer Ağa mahallesinden Fatma bt. Hasan’ın kocasından boşanması Muhâla‘a Mahmiye-i İslâmbol’da Cafer Ağa mahallesinde sâkine ve zâtı vech-i şer‘î üzere mu‘arrefe olan Fatıma bt. Hasan nâm hatun meclis-i şer‘-i hatîrde zevc-i dâhili işbu bâ‘isü’l-kitâb Osman b. Mustafa mahzarında ikrâr ve takrîr-i kelâm edip mezbûr Osman zevcim olup lâkin beynimizde hüsn-i mu‘âşeretimiz olmayıp ben hul‘a tâlibe olduğum ecilden zevcim mezbûrun zimmetinde mütekarrer ve ma‘kūdun-aleyh olan otuz guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Osman ile muhâla‘a-i sahîha-i şer‘iye ile hul‘ olduğumda ol dahi hul‘-ı mezbûru ba‘de’l-kabûl hukūk-ı zevciyete ve sâireye müte‘allika âmme-i de‘âvî ve kâffe-i mutâlebâtdan herbirimiz âharın zimmetini ibrâ ve ıskāt ve herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î. Fî 15 Şevvâl sene 1196 Şühûdü’l-hâl: Hüseyin Efendi b. İbrahim Efendi, Seyyid Süleyman Beşe b. Seyyid İbrahim, İbrahim Beşe b. Mustafa, Molla Ali b. Halil, el-Hâc Hasan b. Osman.