Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 100 Hüküm no: 32 Orijinal metin no: [5a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahimpaşa mahallesinden Ümmügülsüm bt. Mehmed’in kocasından boşanması Muhâla‘a Mahmiye-i İslâmbol’da Silivri Kapısı dâhilinde İbrahim Paşa mahallesinde sâkine takrîben on iki yaşında ve cüssesinin dahi bulûğa tahammülü olmağla meclis-i şer‘de bulûğunu mu‘terife ve zât-ı ta‘rîf-i şer‘î ile mu‘arrefe olan Ümmügülsüm bt. Mehmed nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb Yahya Efendi b. Zekeriya mahzarında ikrâr ve takrîr-i kelâm edip mezbûr Yahya Efendi zevcim olup lâkin beynimizde hüsn-i mu‘âşeretimiz olmamağla zimmetinde mütekarrer ve ma‘kūdun-aleyh olan yetmiş guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Yahya Efendi ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete müte‘allika âmme-i de‘âvî ve kâffe-i mütâlebâtdan ben zevcim mezbûr Yahya Efendi’nin zimmetini ibrâ ve ıskāt eylediğimde kezâlik hukūk-ı zevciyete müte‘allika âmme-i da‘vâdan benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mukırre-i mezbûre Ümmügülsüm’ün vâlidesi mu‘arrefetü’z-zât Zeyneb bt. Abdullah nâm hatun dahi meclis-i şer‘de Yahya Efendi mahzarında takrîr-i kelâm edip eğer kızım mezbûre Ümmügülsüm ba‘de zamânin adem-i bulûğ iddi‘âsıyla mehr-i mezkûrunu mezbûr Yahya Efendi’den da‘vâ ve şer‘an nesne ahz eder ise mikdâr-ı me’hûzuna ben kefîl ve zâmin oldum dedikde mâ-vaka‘a. Fî 17 Şevvâl sene 1196 Şühûdü’l-hâl: Es-Seyyid Ahmed Efendi b. Mehmed Çavuş Ağa, Ömer Efendi Bevvâb, Mehmed Esad Efendi b. Ömer Çavuş, el-Hâc Ahmed b. Mustafa, Molla Ali b. Halil, Ahmed b. İbrahim.