Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 100 Hüküm no: 33 Orijinal metin no: [5b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mimaracem mahallesinden Zeliha bt. Ömer’in bir takım eşyalarını Habibe bt. Eyüb’e satması Eşyâ mübâya‘ası Mahmiye-i İslâmbol’da Mi‘mâr Acem mahallesinde sâkine ve zâtı vech-i şer‘î üzere mu‘arrefe olan Zeliha bt. Ömer nâm hatun meclis-i şer‘de kezâlik zâtı mu‘arrefe işbu bâ‘isü’l-kitâb Habibe bt. Eyüb nâm hatun mahzarında ikrâr ve takrîr-i kelâm edip eşyâ-i memlûkemden bâ-defter-i müfredât otluk memlû dört beledî yasdık ve iki minder ve bir baş yasdığı ve bir basma yorgan ma‘a çârşeb ve bir beledî döşek ve def‘a iki yemeni yorgan bâ-çârşeb ve iki çit mak‘ad ve şalî ve Şam alacası iki entari ve bir sandal hırka ve altı sahan ve dört kapak ve iki tencere bâ-kapak ve bir şorba tası bâ-kapak ve bir kadayıf tepsisi ve def‘a iki sahan bâ-kapak ve bir tencere bâ-kapak ve bir tâbe ve bir sini ve bir leğen ma‘a ibrik ve iki lenger ve bir tasımı tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûre Habibe Hatun’a otuz guruşa bey‘ u temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr otuz guruşa ve bundan akdem mezbûre Habibe Hatun ile zevci işbu hâzır bi’l-meclis el-Hâc Mehmed b. Ahmed’e târih-i kitâba gelince iki sene mikdârı hizmetim sebk etmekle sinîn-i mezkûrede sebk eden hizmetimin ecr-i misline müte‘allika âmme-i de‘âvî ve kâffe-i mutâlebâtdan mezbûre Habibe Hatun ile zevci hâzır-ı mezbûr el-Hâc Mehmed’den herbirinin zimmetlerini ibrâ ve ıskāt eylediğimde onlar dahi ibrâmı kabûl eylediler, ba‘de’l-yevm eşyâ-i muharrere-i mezkûre mezbûre Habibe Hatun’un mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 18 Şevvâl sene 1196 Şühûdü’l-hâl: Ali Efendi İmâm-ı mahalle-i mezbûre, Selim Ağa b. Abdullah, Mehmed Beşe b. Süleyman, Ahmed b. Hüseyin, Molla Ali b. Halil, Mehmed Emin b. Hüseyin.