Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 101 Hüküm no: 34 Orijinal metin no: [5b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arabacı Bayezid mahallesinden Emine bt. Hüseyin’in kendisini boşayan kocasından nafaka alması Hammâliye Mahmiye-i İslâmbol’da Arabacı Bâyezid mahallesinde sâkine ve zâtı vech-i şer‘î üzere mu‘arrefe olan işbu bâ‘isetü’l-kitâb Emine bt. Hüseyin nâm hatun meclis-i şer‘de zevc-i mutallıkı Mehmed Sadık b. Mehmed mahzarında takrîr-i kelâm ve ifâde-i merâm edip zevc-i mutallıkım mezbûrun firâşından hâsıl hamlim olmağla vaz‘-ı haml ile iddetim münkaziye oluncaya değin nafaka ve meûnet-i süknâm içün zevc-i mutallıkım mezbûr üzerine kıbel-i şer‘den kadr-ı ma‘rûf meblağ farz ve takdîr olunmak matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb -tûbâ-lehû ve hüsnü-meâb- efendi hazretleri dahi ber-vech-i muharrer mezbûre Emine Hatun’un vaz‘-ı haml ile iddeti münkaziye oluncaya değin nafaka ve meûnet-i süknâsı içün zevc-i mutallıkı mezbûr üzerine bi’t-terâzî târih-i kitâbdan küllü yevm üçer para farz ve takdîr buyurup meblağ-ı mefrûz-ı mezkûru mezbûre Emine Hatun kendi nafaka ve sâir havâyic-i lâzımesine harc ü sarfa ve vakt-i zarûretde istidâneye ve inde’z-zafer zevc-i mutallıkı mezbûr Mehmed Sadık üzerine rücû‘a mezbûre Emine Hatun’a izin vermeğin mâ-vaka‘a. Fî 15 Şevvâl sene 1196 Şühûdü’l-hâl: Es-Seyyid İsa b. es-Seyyid Mehmed, Mustafa b. Ahmed, Mehmed b. Hasan, es-Seyyid Hasan Beşe b. Ahmed, Molla Ali b. Halil.