Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 102 Hüküm no: 36 Orijinal metin no: [5b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Es-Seyyid Ömer mahallesinden Süleyman Efendi’nin esamesini İsmail b. Yusuf’a devretmesi Esâme Mahmiye-i İslâmbol’da es-Seyyid Ömer mahallesinde sâkin es-Seyyid Süleyman Efendi b. Ahmed meclis-i şer‘-i şerîf-i enverde işbu bâ‘isü’l-kitâb İsmail b. Yusuf mahzarında ikrâr ve takrîr-i kelâm edip ben Sipâh ocağında dokuzuncu bölükde Ahmed İsmail teberdâr-ı saray-ı atik ismiyle mutasarrıf olduğum yevmî yirmi akçe esâmîmi bundan akdem kendi hüsn-i rızâ ve ihtiyârımla mezbûr İsmail’e ferâğ ve kasr-ı yed ve ibtidâ ta‘bîr olunur tezkiresini dahi yedine def‘ ü teslîm eylediğimde ol dahi bedel-i ferâğ olmak üzere bana mâlından teberru‘an iki yüz yirmi guruş def‘ ü teslîm ve ben dahi yedinden tamamen ahz ü kabz ve umûruma sarfla istihlâkden sonra ben esâmî-i mezkûra müte‘allika âmme-i de‘âvî ve kâffe-i mutâlebâtdan mezbûr İsmail’in zimmetini ibrâ ve ıskāt eylediğimde ol dahi bedel-i ferâğ olmak üzere bana medfû‘u olan meblağ-ı müstehlek-i merkūm iki yüz yirmi guruşa müte‘allika âmme-i da‘vâdan benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’l-mu‘teberi’l-mer‘î mâ-vaka‘a. Fî 24 Şevvâl sene 1196 Şühûdü’l-hâl: İbrahim b. Şaban, Selim b. Abdullah, eş-Şeyh Mehmed Nureddin Efendi, Hasan Çavuş Ağa b. Ahmed, Molla Ali b. Halil, Süleyman Çavuş b. Ömer, Ali Ağa b. Mehmed Kapıkethudâsı ve gayruhum.