Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 103 Hüküm no: 37 Orijinal metin no: [5b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aydın Kethuda mahallesinden Havva Hatun’un kocasından boşanması ve birbirlerinin zimmetlerini ibra etmeleri Muhâla‘a Mahmiye-i İslâmbol’da Aydın Kethudâ mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Havva Hatun bt. Osman Ağa meclis-i şer‘-i hatîr-i lâzımü’t-tevkīrde zevc-i dâhili işbu râfi‘ü’l-vesîka Mahmud Çavuş Ağa b. Hüseyin tarafından vech-i âtî üzere vekîl olduğu Ahmed Çavuş Ağa b. Mustafa ve İsmail Çavuş Ağa b. Mustafa nâm kimesneler şehâdetleriyle sâbit olan es-Seyyid Ahmed Efendi b. es-Seyyid Mustafa mahzarında ikrâr ve takrîr-i kelâm edip müvekkil-i mezbûr Mahmud Çavuş Ağa zevcim olup lâkin beynimizde hüsn-i zindegânemiz olmamağla ben hul‘a tâlibe olduğum ecilden zevcim müvekkil-i mezbûrun zimmetinde mütekarrer ve ma‘kūdun-aleyh olan iki yüz elli guruş mehr-i müeccelim ve nafaka-i iddet-i ma‘lûmem üzerlerine [6a] ve meûnet-i süknâm dahi kendi üzerime olmak üzere zevcim müvekkil-i mezbûr Mahmud Çavuş Ağa ile muhâla‘a-i sahîha-i şer‘iye ile hul‘ olduğumda vekîl-i mezbûr dahi bi’l-vekâle hul‘-ı mezbûru ba‘de’l-kabûl hukūk-ı zevciyete müte‘allika âmme-i de‘âvî ve kâffe-i mutâlebâtdan zevcim müvekkil-i mezbûrun zimmetini ibrâ ve ıskāt eylediğimde vekîl-i mezbûr es-Seyyid Ahmed Efendi dahi kezâlik hukūk-ı zevciyete müte‘allika âmme-i de‘âvîden benim zimmetimi bi’l-vekâle ibrâ ve ıskāt edip herbirimiz ber-minvâl-i muharrer bi’l-asâle ve bi’l-vekâle âharın ibrâsını kabûl eyledik dedikde gıbbe’t-tasdîki’ş-şer‘î vekîl-i mezbûr es-Seyyid Ahmed Efendi meclis-i şer‘de mukırre-i mezbûre Havva Hatun’un babası mezbûr Osman Ağa mahzarında takrîr-i kelâm edip müvekkilim mezbûr Mahmud Çavuş Ağa mezbûr Osman Ağa ile beynlerinde cereyân eden ahz ü i‘tâya müte‘allika âmme-i de‘âvîden mezbûr Osman Ağa’nın dahi zimmetini ibrâ ve ıskāt eylediğinde mezbûr Osman Ağa dahi ibrâsını kabûl eyledi dediğini mezbûr Osman Ağa tasdîk etmeğin mâ-vaka‘a. Fî 19 Şevvâl sene 1196 Şühûdü’l-hâl: Silahdâr Ocağı Kethudâsı Eyüb Ağa b. Şükrullah, Veznedâr Mehmed Ağa b. İbrahim, Bölükbaşı Hüseyin Çavuş b. Ali, Ahmed Efendi b. Resul, Ahmed Çavuş Ağa b. Mustafa, İsmail Çavuş Ağa b. Mustafa, Molla Ali b. Halil ve gayruhum.