Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 104 Hüküm no: 38 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mustafa’nın Kâtib Murad mahallesindeki ev arsası hissesini kardeşi Mehmed Said’e satması Arsa mübâya‘ası Mahmiye-i İslâmbol’da Sultan Bâyezid-i Veli Câmi‘-i şerîfi kurbünde ( ) mahallesinde sâkine Âişe bt. Mustafa nâm hatunun zevci ve tarafından ber-vech-i âtî vekîl olduğu zât-ı mezbûreyi ârifân İbrahim Beşe b. Yusuf ve Abdullah Beşe b. Yusuf nâm kimesneler şehâdetleriyle şer‘an sâbit olan Hafız Mehmed b. Ahmed meclis-i şer‘-i hatîr-i lâzımü’t-tevkīrde müvekkile-i mezbûrenin er karındaşı işbu bâ‘isü’l-kitâb Mehmed Said b. Mustafa nâm kimesne mahzarında bi’l-vekâle ikrâr ve takrîr-i kelâm edip mahmiye-i mezbûrede Mevlevîhâne Yenikapısı dâhilinde Kâtib Murad mahallesinde vâki‘ bir tarafdan Hacı Mehmed menzili ve bir tarafdan müşterî-i mezbûr Mehmed Said menzili ve bir tarafdan Buhûrî Hüseyin Ağa menzili ve bir tarafdan tarîk-i âm ile mahdûd terbî‘an yedi yüz zirâ‘ mukāta‘alı arsa derûnunda mevcûd eşcâr-ı müsmire ve bi’r-i mâ ve yedi yüz aded kiremid ve üç tarafdan taş duvarı müştemil bir bâb menzil arsası bin yüz elli iki sehm i‘tibârıyla dört yüz otuz beş sehmi mezbûr Mehmed Said’in ve yedi yüz on yedi sehmi müvekkilem mezbûrenin yedlerinde mülkleri olmağla müvekkilem mezbûre Âişe Hatun arsa-i mahdûde-i mezkûre ile üzerinde mevcûd müştemilât-ı mezkûrede olan yedi yüz on yedi sehmi tarafeynden îcâb ve kabûlü hâvî bey‘-i bâtt-ı sahîh-i şer‘î ile karındaşı mezbûr Mehmed Said’e seksen guruşa bey‘ ve temlik ve teslîm eylediğinde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr seksen guruş mutâlebesinden müvekkilem mezbûre Âişe Hatun karındaşı mezbûr Mehmed Said’in zimmetini ibrâ ve ıskāt eylediğinde ol dahi ibrâsını kabûl eyledi, ba‘de’l-yevm arsa-i mahdûde-i mezkûre ile üzerinde mevcûd müştemilât-ı mezkûrenin mecmû‘u mezbûr Mehmed Said’in mülk-i müşterâsı ve hakk-ı sarfı olup kız karındaşı müvekkilem mezbûre Âişe Hatun’un kat‘a alâka [ve] medhali kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 13 min-Şevvâl sene 1196 Şühûdü’l-hâl: İbrahim Beşe b. Yusuf, Abdullah Beşe b. Yusuf, Çukadâr Ali Ağa b. Mehmed, Molla Ali b. Halil, Hacı Hasan b. Osman.