Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 104 Hüküm no: 39 Orijinal metin no: [6a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Es-Seyyid Ömer mahallesinden Ümmügülsüm bt. Abdullah’ın Lalezar Mehmed Efendi Vakfı’na ait olan tasarrufundaki ev arsası hissesini kocasına ferağ etmesi Arsa ferâğı Mahmiye-i İslâmbol’da es-Seyyid Ömer mahallesinde sâkine ve zâtı vech-i şer‘î üzere mu‘arrefe olan Ümmügülsüm bt. Abdullah nâm hatun meclis-i şer‘-i şerîf-i enverde hâlâ zevci işbu bâ‘isü’l-kitâb es-Seyyid Hasan Ağa b. Ahmed nâm kimesne mahzarında ikrâr ve takrîr-i kelâm edip mahalle-i mezbûrede vâki‘ bir tarafdan el-Hâc Abdullah menzili ve bir tarafdan Mahmud Bey veresesi bağçesi ve bir tarafdan Fatıma Hatun menzili ve bir tarafdan tarîk-i âm ile mahdûd merhûm Lalezar Mehmed Efendi Vakfı’na senevî altmış akçe mukāta‘a-i kadîmeli terbî‘an üç yüz zirâ‘ arsa üzerinde mevcûd olup bâ-hüccet-i şer‘iye yedimde mülk ve hakkım iken ebniye-i menzil-i mezkûr bundan akdem vâki‘ olan harîk-i kebîrde muhterik olup arsa-i mezkûre hâli kalmağla ben arsa-i mezkûrenin nısfını bâ-ma‘rifet-i mütevellî elli guruş bedel mukābelesinde zevcim mezbûr es-Seyyid Hasan Ağa’ya ferâğ-ı mu‘teber-i kat‘î ile ferâğ ve tefvîz eylediğimde ol dahi ber-vech-i muharrer tefevvüz ve kabûl eyledikden sonra bedeli olan elli guruşu arsa-i mezbûre üzerine ber-vech-i iştirâk binâ ihdâsına emr ve tarafımdan zevcim mezbûru tevkîl eyledim, ba‘de’l-yevm arsa-i mezkûrenin nısf-ı şâyi‘i zevcim mezbûrun dâhil-i taht-ı tasarrufu olup benim alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 26 min-Şevvâli’l-mükerrem sene 1196 Şühûdü’l-hâl: Mehmed Emin Efendi İmâm-ı mahalle-i mezbûre, Mehmed Emin Ağa b. Ahmed, Ebûbekir Ağa b. Ali, Ali Ağa b. Hasan, Ali Ağa b. el-Hâc Mehmed, İbrahim Beşe b. Mustafa, İsmail Ağa b. Mustafa, Berber Abdullah b. Abdullah, Molla Ali b. Halil ve gayruhum.