Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 105 Hüküm no: 40 Orijinal metin no: [6b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veled-i Karabaş mahallesinden Zeliha bt. Abdullah’ın kocasından boşanması Muhâla‘a Mahmiye-i İslâmbol’da Veled-i Karabaş mahallesinde sâkine ve zâtı vech-i şer‘î üzere mu‘arrefe olan Zeliha bt. Abdullah nâm hatun meclis-i şer‘-i şerîf-i enverde zevc-i dâhili işbu bâ‘isü’l-vesîka Abdülcelil b. el-Hâc Abdülbâki mahzarında ikrâr ve takrîr-i kelâm edip mezbûr Abdülcelil zevcim olup lâkin beynimizde hüsn-i mu‘âşeretimiz olmamağla ben hul‘a tâlibe olduğum ecilden zevcim mezbûrun zimmetinde mütekarrer ve ma‘kūdun-aleyh olan elli guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Abdülcelil ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve zevcim mezbûrdan matlûbum olan cihet-i karzdan on dört guruş ile zevcim mezbûr bundan akdem beni bilâ-nafaka terk ve diyâr-ı âhara gitmekle ben dahi zevcim mezbûr üzerine kıbel-i şer‘den bâ-hüccet-i şer‘iye takdîr etdirdiğim küllü yevm üçer paradan üç buçuk ayda zimmetinde müctemi‘ yedi guruş otuz beş paraya ve bi’l-cümle hukūk-ı sâireye müte‘allika âmme-i de‘âvî ve kâffe-i mutâlebâtdan ben zevcim mezbûr Abdülcelil’in zimmetini ibrâ ve ıskāt eylediğimde ol dahi kezâlik hukūk-ı zevciyete ve sâire müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î. Fî 25 Şevvâl sene 1196 Şühûdü’l-hâl: Mehmed Çavuş Ağa b. Ali, Molla Ali b. Halil, Ali Ağa b. Mehmed Kapıkethudâsı, Hacı Hasan b. Osman, Mustafa b. Mustafa.