Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 106 Hüküm no: 41 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simkeş mahallesinden Ümmügülsüm bt. Musa’nın boşandığı kocasının zimmetini ibra etmesi Tatlîk Mahmiye-i İslâmbol’da Sîmkeş mahallesinde sâkine ve zâtı vech-i şer‘î üzere mu‘arrefe olan Ümmügülsüm bt. Musa nâm hatun meclis-i şer‘-i şerîf-i enverde zevc-i mutallıkı işbu bâ‘isü’l-vesîka Hafız Mehmed Emin Efendi b. Yusuf nâm kimesne mahzarında ikrâr ve takrîr-i kelâm edip mezbûr Hafız Mehmed Emin Efendi iki def‘a akidde müsemmâ otuz iki buçuk guruş mehr-i müeccelim tesmiyesiyle zevc-i dâhilim ve firâşından hâsıl hamlim olduğu hâlde târih-i kitâb günü beni tatlîk etmekle zimmetinde ma‘kūdun-aleyh olan otuz iki buçuk guruş mehr-i mezkûrumu işbu meclis-i akidde bana def‘ ü teslîm eyledikde ben dahi yedinden tamamen ahz ü kabz edip nafaka-i hamlimden mâ‘adâ hukūk-ı zevciyete müte‘allika âmme-i de‘âvî ve kâffe-i mutâlebâtdan ben zevc-i mutallıkım mezbûr Hafız Mehmed Emin Efendi’nin zimmetini ibrâ-i âm ile ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 19 Şevvâl sene 1196 Şühûdü’l-hâl: Hafız Numan Efendi b. Süleyman, Hüseyin Efendi b. İbrahim Efendi, el-Hâc Hasan b. Osman, Molla Mehmed b. Mustafa, Molla Ali b. Halil.