Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 106 Hüküm no: 42 Orijinal metin no: [6b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Murad Paşa-yı Atik mahallesinden Ahmed Ağa’nın evi ile birlikte yanan hüccetinin yenilenmesini istemesi İstihbâr-ı menzil Mahmiye-i İslâmbol’da Murad Paşa-yı Atik mahallesinde sâkin işbu bâ‘isü’l-vesîka el-Hâc Ahmed Ağa b. Mehmed nâm kimesne meclis-i şer‘-i hatîr-i lâzımü’t-tevkīrde takrîr-i kelâm ve bast-ı merâm edip mahalle-i mezbûrede vâki‘ bir tarafdan Esirci Tuti menzili arsası ve bir tarafı Arabacıbaşı Süleyman Ağa veresesi menzili arsası ve bir tarafdan Haremeyn-i Muhteremeyn Vakfı’ndan menzil arsası ve bir tarafdan tarîk-i âm ile mahdûd müştemilât-ı ma‘lûmeyi hâvî terbî‘an dört yüz doksan altı zirâ‘ arsalı bir bâb mülk menzil bin yüz doksan üç senesi şehr-i Rebî‘ülâhır’ının on yedinci günü gāibe ani’l-meclis Hadice Hatun bt. Abdullah’dan bin üç yüz guruş semen-i medfû‘ ve makbûza müşterâ bâ-hüccet-i şer‘iye yedimde mülk [ve] hakkım iken menzil-i mezkûr ve yedimde olan mülknâme hüccetim bundan akdem vâki‘ olan harîk-i kebîrde muhterik olup ancak arsa-i memlûke-i mezkûresi kalmağla arsa-i mezkûre ber-vech-i muharrer mülk-i müşterâm olduğu vukūf-ı tammı olan bî-garaz Müslimînden suâl ve istihbâr ve haberleri zabt u tahrîr ve kıbel-i şer‘den hüccet olunup yedime i‘tâ olunmak matlûbumdur dedikde mahalle-i mezbûre ahâlisinden el-Hâc Ali b. Hasan ve İbrahim Çelebi b. Mustafa ve Halil Beşe b. Abdullah ve Molla Ali b. Halil nâm kimesneler fi’l-hakīka menzil-i mahdûd-ı mezkûr mukırr-ı mezbûr el-Hâc Ahmed Ağa’nın gāibe-i mezbûre Hadice Hatun’dan târih-i mezbûrda semen-i merkūm-ı medfû‘ ve makbûza müşterâ mülk-i mahzı ve hakk-ı sırfı olduğunu herbiri meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl bi’t-taleb ketb olundu. Fî 18 min-Şevvâli’l-mükerrem sene 1196 Şühûdü’l-hâl: Hafız Numan Efendi b. Süleyman, Molla Ahmed b. Hüseyin, Molla Mustafa b. Abdullah, İbrahim Çelebi b. Mustafa, Ebûbekir Efendi b. Abdülkerim, Şehrî Mehmed Ağa b. Mehmed, Hafız Ahmed Efendi b. Hüseyin, Molla Ali b. Halil, el-Hâc Ali Ağa b. Hasan, Halil Beşe b. Abdullah, Tütüncü Molla Mustafa, el-Hâc Hasan b. Osman, Muhzır Molla Mehmed b. ( ).