Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 107 Hüküm no: 43 Orijinal metin no: [6b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çivizade mahallesinden Fatma bt. İbrahim’in boşandığı kocasının zimmetini ibra etmesi Tatlîk Mahmiye-i İslâmbol’da Çivizâde mahallesinde sâkine ve zâtı vech-i şer‘î üzere mu‘arrefe olan Fatıma bt. İbrahim nâm hatun meclis-i şer‘-i şerîf-i enverde zevc-i mutallıkı işbu bâ‘isü’l-kitâb es-Seyyid Hüseyin Beşe b. Ali nâm kimesne mahzarında ikrâr ve takrîr-i kelâm edip mezbûr es-Seyyid Hüseyin Beşe yüz guruş mehr-i müeccel tesmiyesiyle zevc-i dâhilim olduğu hâlde târih-i kitâbdan bir gün mukaddem beni tatlîk etmekle zimmetinde ma‘kūdun-aleyh olan mehr-i müeccel-i mezkûr yüz guruş hakkım ile nafaka-i iddet ve meûnet-i süknâmı zevc-i mutallıkım mezbûr es-Seyyid Hüseyin Beşe’den bu esnâda taleb ve da‘vâya tesaddî etmiş idim. El-hâletü hâzihî beynimize muslihûn tavassutuyla ben ber-vech-i muharrer tesaddî eylediğim da‘vâ-yı mezkûremden meccânen fâriğa olup mehr-i mezkûr yüz guruşa ve bi’l-cümle hukūk-ı zevciyete ve sâire müte‘allika âmme-i de‘âvî ve kâffe-i mutâlebâtdan ben zevcim mezbûr es-Seyyid Hüseyin Beşe’nin zimmetini ibrâ ve ıskāt eylediğimde ol dahi kezâlik hukūk-ı zevciyete ve sâire müte‘allika âmme-i da‘vâdan benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 19 L sene 1196 Şühûdü’l-hâl: Molla Ali b. Halil, Osman b. Mustafa, el-Hâc Hasan b. Mehmed, Süleyman Beşe b. Hüseyin, İbrahim b. Hüseyin, Hüseyin b. Ebîbekir.