Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 108 Hüküm no: 44 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâtib Murad mahallesinden Mehmed Said’in ev enkazı hissesini kız kardeşi Ayşe Hatun’a satması Enkāz mübâya‘ası Mahmiye-i İslâmbol’da Mevlevîhâne Yenikapısı dâhilinde Kâtib Murad mahallesinde sâkin Mehmed Said b. Mustafa nâm kimesne meclis-i şer‘-i şerîf-i enverde kız karındaşı işbu râfi‘a[tü’l-kitâb] Âişe bt. el-mezbûr Mustafa’nın zevci ve tarafından vech-i âtî üzere tasdîka vekîli olduğu ber-nehc-i şer‘î sâbit Hafız Mehmed b. Ahmed nâm kimesne mahzarında ikrâr ve takrîr-i kelâm edip mahalle-i mezbûrede vâki‘ etrâf-ı erba‘ası el-Hâc Mehmed menzili ve benim âhar menzilim ve Buhûrî Hüseyin Ağa menzili ve tarîk-i âm ile mahdûd terbî‘an yedi yüz zirâ‘ mukāta‘alı arsa üzerinde mevcûd enkāz-ı ma‘lûmenin bin yüz elli iki sehm i‘tibârıyla dört yüz otuz beş sehmi benim mülküm ve yedi yüz on yedi sehmi kız karındaşım müvekkile-i mezbûre Âişe Hatun’un yedinde mülkü olmağla ben arsa-i mezkûre üzerinde mevcûd enkāz-ı ma‘lûme-i mezkûreden olan dört yüz otuz beş sehmi tarafeynden îcâb ve kabûlü hâvî bey‘-i kat‘î ve safka-i vâhide ile kız karındaşım müvekkile-i mezbûre Âişe Hatun’a altmış guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı merkūm altmış guruş mutâlebesinden dahi kız karındaşım müvekkile-i mezbûre Âişe Hatun’un zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm arsa-i mahdûde-i mezkûre üzerinde mevcûd enkāz-ı ma‘lûme-i mezkûrenin mecmû‘u kız karındaşım müvekkile-i mezbûre Âişe Hatun’un mülk-i mahzı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 18 Şevvâl sene 1196 Şühûdü’l-hâl: el-Hâc Hasan b. Osman, Molla Ali b. Halil, İbrahim Beşe b. Yusuf, Abdullah Beşe b. Yusuf, Çukadâr Ali b. Mehmed.