Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 109 Hüküm no: 45 Orijinal metin no: [7a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çivizade mahallesinden Fatma bt. İbrahim’in bakmakta olduğu küçük kızı için boşandığı kocasından nafaka alması Nafaka-i sagīr Mahmiye-i İslâmbol’da Çivizâde mahallesinde sâkine ve zâtı vech-i şer‘î üzere mu‘arrefe olan işbu bâ‘isetü’l-kitâb Fatıma bt. İbrahim nâm hatun meclis-i şer‘-i şerîf-i enverde zevc-i mutallıkı es-Seyyid Hüseyin Beşe b. Ali nâm kimesne mahzarında takrîr-i kelâm ve bast-ı merâm edip zevc-i mutallıkım mezbûr es-Seyyid Hüseyin Beşe’nin firâşından hâsıla ve benden mütevellide ve hâlâ bi-hakkı’l-hıdâne benim hacr u terbiyemde olan sadriye sagīre kızım Şerife Ümmügülsüm’ün mâlı olmayıp nafaka ve kisveye ihtiyâcı olmağla kızım sagīre-i mezbûrenin nafaka ve kisvesi içün babası mezbûr es-Seyyid Hüseyin Beşe üzerine kıbel-i şer‘den kadr-ı ma‘rûf meblağ farz ve takdîr olunmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb -tûbâ-lehû ve hüsnü-meâb- efendi hazretleri dahi sagīre-i mezbûrenin ber-vech-i muharrer nafaka ve kisvesi içün babası mezbûr es-Seyyid Hüseyin Beşe üzerine bi’t-terâzî târih-i kitâbdan küllü yevm dörder para farz ve takdîr buyurup meblağ-ı mefrûz-ı mezkûru sagīre-i mezbûrenin nafaka ve kisve ve sâir levâzım-ı zarûriyesine harc ü sarfa ve vakt-i zarûretde istidâneye ve inde’z-zafer babası mezbûr es-Seyyid Hüseyin Beşe üzerine rücû‘a mezbûre Fatıma Hatun’a izin vermeğin mâ-vaka‘a bi’t-taleb ketb olundu. Fî 19 min-L sene [1]196 Şühûdü’l-hâl: Hüseyin b. Ebîbekir, İbrahim b. Hüseyin, Süleyman Beşe b. Hüseyin, el-Hâc Hasan b. Mehmed, Osman b. Mustafa, Molla Ali b. Halil ve gayruhum.