Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 110 Hüküm no: 47 Orijinal metin no: [7a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simkeş mahallesinden Ümmügülsüm bt. Musa’nın kendisini boşayan Hafız Mehmed Emin Efendi’den nafaka alması Hammâliye Mahmiye-i İslâmbol’da Sîmkeş mahallesinde sâkine ve zâtı ta‘rîf-i şer‘î üzere mu‘arrefe olan işbu râfi‘atü’l-vesîka Ümmügülsüm bt. Musa nâm hatun meclis-i şer‘-i şerîf-i enverde zevc-i mutallıkı Hafız Mehmed Emin Efendi b. Yusuf nâm kimesne mahzarında takrîr-i kelâm ve bast-ı merâm edip zevc-i mutallıkım mezbûr Hafız Mehmed Emin Efendi’nin firâşından hâsıla <> hamlim olmağla vaz‘-ı haml ile iddetim münkaziye oluncaya değin nafaka ve meûnet-i süknâm içün zevc-i mutallıkım Hafız Mehmed Emin üzerine kıbel-i şer‘den kadr-ı ma‘rûf meblağ farz ve takdîr olunmak matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb -tûbâ-lehû ve hüsnü-meâb- efendi hazretleri dahi mezbûr[e] Ümmügülsüm Hatun’un vaz‘-ı haml ile iddeti münkaziye oluncaya değin nafaka ve meûnet-i süknâsı içün zevc-i mutallıkı mezbûr Hafız Mehmed Emin Efendi üzerine bi’t-terâzî târih-i kitâbdan küllü yevm ondörder akçe farz ve takdîr buyurup meblağ-ı mefrûz-ı mezkûru mezbûre Ümmügülsüm Hatun kendi nafaka ve kisvesine harc ü sarfa ve vakt-i zarûretde istidâneye ve inde’z-zafer zevc-i mutallıkı mezbûr Hafız Mehmed Emin Efendi üzerine rücû‘a mezbûre Ümmügülsüm Hatun’a izin vermeğin mâ-vaka‘a bi’t-taleb. Fî 19 Şevvâl sene 1196 Şühûdü’l-hâl: Hafız Numan Efendi b. Süleyman, Hüseyin Efendi b. İbrahim, el-Hâc Hasan b. Osman, Molla Ali b. Halil.