Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 111 Hüküm no: 49 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bazergân mahallesinden Fatma bt. Süleyman’ın kocasından boşanması Muhâla‘a Mahmiye-i İslâmbol’da Koca Mustafa Paşa Câmi‘-i şerîfi kurbünde Bâzergân mahallesinde sâkine Fatıma bt. el-Hâc Süleyman b. Mustafa tarafından vech-i âtî üzere hul‘ ve ibrâya vekîl olduğu zât-ı mezbûreyi bi’l-ma‘rifeti’ş-şer‘iye ârifân es-Seyyid Ali Efendi b. es-Seyyid Mehmed Emin ve Hafız Mehmed Efendi b. Mustafa nâm kimesneler şehâdetleriyle sâbit olan es-Seyyid Mehmed Hamid Efendi b. Ebîbekir nâm kimesne meclis-i şer‘-i hatîr-i lâzımü’t-tevkīrde müvekkile-i mezbûrenin zevci işbu bâ‘isü’l-vesîka es-Seyyid Mustafa Ağa b. el-Hâc Mehmed Emin nâm kimesne mahzarında bi’l-vekâle ikrâr-ı tam ve takrîr-i kelâm edip mezbûr es-Seyyid Mustafa Ağa müvekkilem mezbûre Fatıma Hatun’un zevc-i dâhili olup lâkin beynlerinde hüsn-i zindegâneleri olmayıp müvekkilem mezbûre Fatıma Hatun hul‘a tâlibe olduğu ecilden zevci mezbûr es-Seyyid Mustafa Ağa zimmetinde mütekarrer ve ma‘kūdun-aleyh olan on bin akçe mehr-i müecceli ve nafaka-i iddet-i ma‘lûmesi üzerlerine ve meûnet-i süknâsı dahi müvekkilem mezbûre Fatıma Hatun’un kendi üzerine olmak üzere müvekkilem mezbûre Fatıma Hatun’u zevci mezbûr es-Seyyid Mustafa Ağa ile muhâla‘a-i sahîha-i şer‘iye ile ben bi’l-vekâle muhâla‘a eylediğimde mezbûr es-Seyyid Mustafa Ağa dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve esnâ-i akidden târih-i kitâba gelince beynlerinde cereyân eden ahz ü i‘tâya ve bi’l-cümle hukūk-ı sâireye müte‘allika âmme-i de‘âvî ve kâffe-i mutâlebât ve eymân ve muhâsamâtdan mezbûr es-Seyyid Mustafa Ağa’nın zimmetini ibrâ-i âm ile bi’l-vekâle ibrâ ve ıskāt eylediğimde mezbûr Mustafa Ağa dahi kezâlik hukūk-ı zevciyete ve hâli olup bundan akdem vefât eden es-Seyyid İbrahim b. Hacı Mustafa’nın terekesine ve kezâlik târih-i kitâba gelince beynlerinde cereyân eden ahz ü i‘tâya ve bi’l-cümle hukūk-ı sâireye müte‘allika âmme-i de‘âvîden müvekkilem mezbûre Fatıma Hatun’un zimmetini ibrâ-i âm ile ibrâ ve ıskāt edip herbirimiz bi’l-asâle ve bi’l-vekâle ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 26 min-Şevvâl sene 1196 Şühûdü’l-hâl: Nevbetçi Molla Mustafa, Hacı Hasan b. Osman, Molla Ali b. Halil, Molla Ahmed b. Hüseyin, Molla Mustafa b. Abdullah, Şehrî Mehmed Ağa b. Mehmed, Hafız Ahmed b. Hüseyin, Hafız Numan Efendi b. Süleyman ve gayruhum.