Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 113 Hüküm no: 51 Orijinal metin no: [7b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alifakih mahallesinden Abdulkadir Ağa’nın vefatı üzerine vârisi olan annesi Hadice bt. Mustafa’nın miras işlemlerini yapması içün diğer vâris Hüseyin Ağa’ya vekâlet vermesi Vekâlet Mahmiye-i İslâmbol’da Ali Fakih mahallesi ahâlisinden olup vilâyet-i Anadolu’da hâlâ medîne-i Konya vâlîsi vezir-i mükerrem devletlü sa‘âdetlü Mustafa Paşa hazretlerinin hizmet-i şerîflerinde iken paşa-yı müşârün-ileyh hazretlerinin ba‘zen umûrunu rü’yet içün İslâmbol’a gelip menzilinde bundan akdem vefât eden Abdulkadir Ağa b. el-Hâc Osman b. el-Hâc Hüseyin nâm kimesnenin verâseti vâlidesi Hadice bt. Mustafa nâm hatun ile usûbet-i nesebiyye cihetinden müteveffâ-yı mezbûrun ceddi el-Hâc Hüseyin’in li-ebeveyn er karındaşı oğlunun oğlunun oğlu Hüseyin Ağa b. Mehmed b. Abdurrahman’a münhasıra ve mesele-i mîrâsları üç sehm i‘tibârıyla bir sehmi vâlidesi mezbûre Hadice Hatun’a ve iki sehmi mezbûr Hüseyin Ağa’ya isâbeti tahakkukundan sonra zâtı vech-i şer‘î üzere mu‘arrefe olan mezbûre Hadice Hatun meclis-i şer‘-i şerîf-i enverde işbu bâ‘isü’l-kitâb mezbûr Hüseyin Ağa mahzarında bi’l-verâse ikrâr ve takrîr-i kelâm edip oğlum mûrisim müteveffâ-yı mezbûrun medîne-i mezbûrede mevcûd olan bi’l-cümle terekesinden ber-i‘tibâr-ı mezkûr benim bir sehmime isâbet eden hisse-i irsiyemi vâzı‘ü’l-yed olanlardan mahâllinde taleb ve da‘vâ ve ahz ü kabza ve lede’l-iktizâ sulh ve ibrâya ve makbûzunu bana îsâl ve teslîme ve husûs-ı mezkûre mütevakkıf olduğu umûrun küllîsine mezbûr Hüseyin Ağa’yı tarafımdan vekîl ve nâib-i menâb nasb ü ta‘yîn eyledim dedikde mezbûr Hüseyin Ağa dahi ber-vech-i muharrer vekâlet-i merkūmeyi kabûl ve hizmet-i lâzımesini kemâ-yenbağī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 27 min-Şevvâli’l-mükerrem sene 1196 Şühûdü’l-hâl: Yusuf Ağa b. Osman, Tatar Mustafa b. Osman, Mahmud Ağa b. ( ), Veliyüddin Ağa b. ( ), Hüseyin Efendi b. ( ) Kethudâ ve gayruhum.