Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 113 Hüküm no: 52 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Denizabdal mahallesinden Fatma bt. Hasan’ın yanında hizmetçi olarak çalıştığı Ümmügülsüm Hatun’un zimmetini ibra etmesi Ecr-i mislinden ibrâ ve îcâr Mahmiye-i İslâmbol’da Şehremîni kurbünde Deniz Abdal mahallesinde sâkine takrîben on dört yaşında olup cüssesinin dahi bulûğa tahammülü olmağla rü’yet-i dem-i hayzla bulûğunu mu‘terife ve zâtı şer‘an mu‘arrefe olan Fatıma bt. Hasan nâm bikr-i bâliğa meclis-i şer‘-i şerîf-i enverde işbu bâ‘isetü’l-vesîka Ümmügülsüm Hatun bt. Ahmed’in zevci ve tarafından vech-i âtî üzere tasdîka vekîli olduğu ber-nehc-i şer‘î sâbit olan es-Seyyid Ahmed Şakir Efendi b. es-Seyyid Mehmed Râtib mahzarında ikrâr-ı tam ve takrîr-i kelâm edip ben müvekkile-i mezbûre Ümmügülsüm’ün talebi ve beher şehr yüzer para ücret tesmiyesiyle müvekkile-i mezbûre Ümmügülsüm Hatun menzilinde işbu târih-i kitâba gelince üç sene hizmet edip ve ücret-i müsemmâ-yı mezkûrem olan yüzer parayı beher re’s-i şehrde müvekkile-i mezbûre Ümmügülsüm Hatun bana def‘ ü teslîm ve ben dahi yedinden tamamen ahz ü kabz etmişdim. El-hâletü hâzihî sinîn-i mezkûrede ber-vech-i muharrer eylediğim hizmetimin ecr-i müsemmâ ve misline müte‘allika âmme-i de‘âvî ve kâffe-i mutâlebât ve eymân ve muhâsamâtdan müvekkile-i mezbûre Ümmügülsüm Hatun ile zevci vekîl-i mezbûr es-Seyyid Ahmed Şakir Efendi’den herbirinin zimmetlerini ibrâ-i âm ile ibrâ ve ıskāt eylediğimde onlar dahi ber-minvâl-i muharrer ibrâmı kabûl eylediklerinden sonra ben yine müvekkile-i mezbûre Ümmügülsüm Hatun’a menzilinde hizmet etmek içün nefsimi târih-i kitâbdan ke’l-evvel beher şehr yüzer para ücret tesmiyesiyle müvekkile-i mezbûre Ümmügülsüm Hatun’a îcâr ve teslîm ve ücret-i müsemmâ-yı mezkûrumu benim nafaka ve kisveme harc u sarfa müvekkile-i mezbûre Ümmügülsüm Hatun’a emr ve tarafımdan tevkîl eylediğimde ol dahi ber-vech-i muharrer <> istîcâr ve tesellüm ve kabûl edip ücret-i müsemmâ-yı mezkûremi ber-vech-i muharrer benim nafaka ve kisveme harc ü sarfa ta‘ahhüd ve iltizâm eyledi dediğini vekîl-i mezbûr es-Seyyid Ahmed Şakir Efendi tasdîk ve tahkīk etmeğin mâ-vaka‘a bi’t-taleb. Fî 28 min-Şevvâli’l-mükerrem sene 1196 Şühûdü’l-hâl: Nevbetçi Molla Mustafa b. Mustafa, Muhzır Ahmed b. Mehmed, Muhzır Molla Mehmed b. Mustafa, el-Hâc Hasan b. Osman, Molla Ali b. Halil ve gayruhum.