Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 114 Hüküm no: 53 Orijinal metin no: [8a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Canbaziye mahallesinden Âlime bt. İbrahim’in yeğeni İsmihan bt. Süleyman’a bir miktar para ile bazı ziynet eşyalarını hibe etmesi ve bazı eşyalarını da satması Eşyâ mübâya‘ası husûs ile Husûs-ı âti’l-beyânın mahâllinde ketb ü tahrîri içün bi’l-iltimâs kıbel-i şer‘-i enverden mezûnen meb‘ûs Hafız Numan Efendi mahmiye-i İslâmbol’da Koca Mustafa Paşa kurbünde Canbaziye mahallesinde vâki‘ Berber Hasan b. Mehmed’in menziline varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i hatîr etdikde menzil-i mezbûrda sâkine ve zâtı Müslimûn-ı merkūmûn ta‘rîfleriyle mu‘arrefe olan Âlime bt. İbrahim nâm hatun meclis-i ma‘kūd-ı mezkûrda li-ebeveyn kız karındaşı kızı olup kezâlik zâtı mu‘arrefe olan işbu bâ‘isetü’l-vesîka İsmihan bt. Süleyman nâm hatun mahzarında ikrâr ve takrîr-i kelâm edip yedimde mâlım ve mülküm olan otuz guruş nakdim ile yirmi dört miskāl bir çift altın kuşak ve bir çift incili küpe ve bir sîm sâ‘atimi hibe-i sahîha-i şer‘iye ile mezbûre İsmihan Hatun’a hibe ve temlik ve teslîm eylediğimde ol dahi ber-vech-i muharrer ittihâb ve temellük ve tesellüm ve kabz u kabûl eyledikden sonra eşyâ-i memlûkemden dahi yün memlû çatma ve beledî altı yasdık ve yedi baş yasdığı ve yedi yemeni yorgan bâ-çârşeb ve altı şilte ve iki beledî döşek ve iki minder gılâfı ve üç orta keçesi ve iki çit mak‘ad ve üç bilek ve üç şali entari ve çiçekli ve şalî iki kürk kabı ve üç top bez ve iki gömlek ve iki çuka ferâce ve bir hamam rahtı ve iki sandık ve on yedi sahan ve beş tencere ve bir satıl ve bir kazgan bâ-kapak ve bir çorba tası ve bir süzgü ve sagīr ve kebîr üç tâbe ve bir saplı ayak ve iki güğüm ve bir mangal ve bir saç ve iki musluklu güğüm ve bir câmeşûy leğeni ve bir bakraç ve bir kahve tepsisi ve iki kadayıf tepsisi ve iki maşraba ve iki kefgir ve bir saplı tencere ve beş kahve ibriği ve beş sahan kapağı ve üç tencere kapağı ve iki sini ve bir fener ve iki tasımı tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûre İsmihan Hatun’a seksen guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni [olan] meblağ-ı mezbûr seksen guruş mutâlebesinden dahi mezbûre İsmihan Hatun’un zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm nakd-i merkūm otuz guruş ile zikr olunan kuşak ve küpe ve sâ‘at-ı mezbûre İsmihan Hatun’un mülk-i mevhûbesi ve eşyâ-i sâire-i muharrere-i mezkûre dahi mülk-i müşterâsı ve hakk-ı sarfı olup benim aslâ alâka ve medhalim kalmamışdır dedikde gıbbe’t-tasdîki’ş-şer‘î vâki‘ hâli mevlana-yı mezbûr mahâllinde ketb ü tahrîr, ba‘dehû mâ‘an meb‘ûs ümenâ-i şer‘le meclis-i şer‘a gelip alâ-vukū‘ıhî inhâ ve takrîr etmeğin mâ-vaka‘a bi’t-taleb. Fî 25 Şevvâl sene 1196 Şühûdü’l-hâl: İmâm Mehmed Emin Efendi, İmâm Vekîli es-Seyyid İsmail Efendi, Müezzin Molla Hüseyin b. Ali, Molla Ali b. Halil, Hüseyin b. Ali.