Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 115 Hüküm no: 54 Orijinal metin no: [8a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçübaşı mahallesinden Fatma bt. Ahmed’in kendisini boşayan Osman b. Süleyman’dan mehrini alarak zimmetini ibra etmesi Tatlîk Mahmiye-i İslâmbol’da Topkapısı dâhilinde Kürkçübaşı mahallesinde sâkine ve zâtı vech-i şer‘î üzere mu‘arrefe olan Fatıma bt. Ahmed nâm hatun meclis-i şer‘-i hatîrde zevc-i mutallıkı işbu bâ‘isü’l-kitâb Osman b. Süleyman mahzarında ikrâr ve takrîr-i kelâm edip mezbûr Osman iki def‘a akidde müsemmâ yirmi beş guruş mehr-i müeccel tesmiyesiyle zevc-i dâhilim ve firâşından hâsıl hamlim olduğu hâlde târih-i kitâb günü beni tatlîk etmekle zimmetinde ma‘kūdun-aleyh olan yirmi beş guruş mehr-i mezkûrumu bana def‘ ü teslîm eyledikde ben dahi yedinden tamamen ahz ü kabz edip nafaka-i hamlimden mâ‘adâ hukūk-ı zevciyete müte‘allika âmme-i de‘âvî ve kâffe-i mutâlebâtdan ben zevc-i mutallıkım mezbûr Osman’ın zimmetini ibrâ ve ıskāt eylediğimde ol dahi kezâlik hukūk-ı zevciyete müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 2 Zilka‘de sene 1196 Şühûdü’l-hâl: Ahmed Beşe b. Mustafa, Mehmed b. Mehmed, Molla Ali b. Halil, Ali Ağa b. Mehmed, Hacı Hasan b. Osman.