Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 117 Hüküm no: 57 Orijinal metin no: [8b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dere mahallesinden Halide bt. Süleyman’ın kendisini boşayan kocasından nafaka alması Hammâliye Medîne-i Hazret-i Ebî Eyyûb-i Ensârî -radiye anhü’l-bârî-de Dere mahallesinde sâkine ve zâtı vech-i şer‘î üzere mu‘arrefe olan işbu râfi‘atü’l-vesîka Halide bt. Süleyman nâm hatun meclis-i şer‘-i şerîf-i enverde zevc-i mutallıkı Ahmed b. Mehmed nâm kimesne mahzarında bast-ı kelâm ve ifâde-i merâm edip zevc-i mutallıkım mezbûr Ahmed’in firâşından hâsıl hamlim olmağla vaz‘-ı haml ile iddetim münkaziye oluncaya değin nafaka ve meûnet-i süknâm içün zevc-i mutallıkım mezbûr Ahmed üzerine kıbel-i şer‘den kadr-ı ma‘rûf meblağ farz ve takdîr olunmak matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb bi-tevfîkıhi’r-refî‘i’l-müstetâb -tûbâ-lehû ve hüsnü-meâb- efendi hazretleri dahi mezbûre Halide Hatun’un vaz‘-ı haml ile iddeti münkaziye oluncaya değin nafaka ve meûnet-i süknâsı içün zevc-i mutallıkı mezbûr Ahmed üzerine târih-i kitâbdan küllü yevm sekizer akçe farz ve takdîr buyurup meblağ-ı mefrûz-ı mezkûru mezbûre Halide Hatun kendi nafaka ve meûnet-i süknâsına harc ü sarfa ve lede’l-hâce istidâneye ve inde’z-zafer zevc-i mutallıkı mezbûr Ahmed üzerine rücû‘a mezbûre Halide Hatun’a izin vermeğin mâ-vaka‘a bi’t-taleb. Fî 5 min-Zilka‘deti’ş-şerîfe sene 1196 Şühûdü’l-hâl: Hüseyin Çelebi Muhzır, Molla Ali b. Halil, el-Hâc Hasan b. Osman, Molla Mehmed b. Mustafa, Nevbetçi Molla Mustafa.