Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 117 Hüküm no: 58 Orijinal metin no: [8b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Pîrî mahallesinden Hanife bt. Ebîbekir’in kocasından boşanması Muhâla‘a Mahmiye-i İslâmbol’da Yedikule dâhilinde Hacı Pîrî mahallesinde sâkine ve zâtı vech-i şer‘î üzere mu‘arrefe olan Hanife bt. Ebîbekir nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb Abdullah b. Süleyman nâm kimesne mahzarında mezbûr Abdullah zevcim olup lâkin beynimizde hüsn-i mu‘âşeretimiz olmayıp ben hul‘a tâlibe olduğum ecilden zevcim mezbûrun zimmetinde iki def‘a akidde müsemmâ yetmiş guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Abdullah ile muhâla‘a-i sahîha-i şer‘iye ile hul‘, ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve sâire müte‘allika âmme-i de‘âvî ve kâffe-i mutâlebâtdan ben zevcim mezbûr Abdullah’ın zimmetini ibrâ ve ıskāt eylediğimde ol dahi kezâlik hukūk-ı zevciyete ve sâire müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 3 Zilka‘de sene 1196 Şühûdü’l-hâl: Es-Seyyid Mehmed Said b. Mehmed, İbrahim Beşe b. Mustafa Lüleci, Molla Ali b. Halil, Hacı Hasan b. Osman.